İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 649 Hüküm no: 760 Orijinal metin no: [96b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Öldürülen 34. Sekbanlar Odası neferlerinden Ahmed Beşe’nin kısas diyeti hususunda ebeveyninin Kürt Muslı Beşe ile bin akçe üzerine sulh olduğu Sulh, ibrâ. Dergâh-ı âlî yeniçerilerinin otuz dört sekbânlar odası neferâtından olup Limni Odası’nda nevbetci iken cerîhan fevt olan Ahmed Beşe’nin hasran vârisleri babası Mustafa ile vâlidesi Saime bt. Ali nâm hatun meclis-i şer‘de oda-i merkūme neferâtından Kürt Muslı Beşe b. Abdullah tarafından husûs-ı âtîye vekîl olup bi-mâ hüve tarîkı’s-sübût vekâleti sâbite olan Başkullukcu Hüseyin Beşe nâm râcil mahzarında tav‘an her biri ikrâr ve takrîr-i kelâm edip müvekkil-i mezbûr Muslı Beşe oğlumuz mezbûr Ahmed Beşe ile oda-i merkūmede nevbetci iken oğlumuzu mûceb-i kısas olan âlet-i câriha ile urup katleylediği sâbit ve zâhir olmağla habsde olup bizim dahi ihkāk-ı hak için ol odaya varmağa iktidârımız olmamağla mezbûr Hüseyin Beşe ile bin akçe üzerine sulh olup ol dahi sulh-ı mezbûru kabûl ve bedel-i sulh olan bin akçeyi mezbûr yedinden kabz edip kısasa müte‘allika da‘vâdan her birimiz Muslı Beşe’nin zimmetini ibrâ ve ıskāt eyledik dediklerinde mezbûr Hüseyin Beşe dahi meclis-i merkūmda kezâlik mezbûrân mahzarında ikrâr edip ben dahi müteveffâ-yı mezbûr Ahmed Beşe’nin zikrolunan odada mevcûd olan muhallefâtını vâzı‘u’l-yed olanlardan alıp vârisân-ı mezbûrâna teslîme ta‘ahhüd eyledim min-ba‘d ol muhallefâtı vârisân-ı mezbûrân Mustafa ve Saime benden alsınlar dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-Zilka‘deti’ş-şerîfe sene 1072. Şuhûdü’l-hâl: İslam Beşe b. Hasan el-mübâşir, Mehmed Beşe b. ( ), Mustafa Beşe b. ( ), İvaz Beşe b. ( ), Arnavud Mustafa Beşe b. ( ), Mehmed Beşe b. Abdullah, Halil Beşe b. Abdullah, Mehmed Beşe b. Abdullah, Hüseyin Efendi el-Burûsî, Abdullah b. Hüseyin, Şükrullah b. Mustafa, Ahmed b. Osman 56. [bölü]k.