İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 657 Hüküm no: 771 Orijinal metin no: [98a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Osman’ın çocukları Mehmed ve Hüseyin’in arsası üzerine kendisi için mülk bina yapıp arsası ile alakası olmadığını çocukların vasîsi huzurunda ikrar ettiği Mahmiye-i İstanbul’da Kızılminâre mahallesi ahâlîsinden olup mukaddemâ fevt olan el-Hâc Mehmed b. Aydın nâm kimesnenin sulbî sagīr oğulları Mehmed ve Hüseyin’in vâlideleri ve savb-ı şer‘den mansûbe vasîleri İsmihan bt. Osman nâm hatun tarafından ikrâr-ı câ’i’z-zikre vekîl olup zâtını ma‘rifet-i şer‘iye ile ârifân Mustafa Çelebi b. Ahmed ve Ahmed Çelebi b. Mehmed nâm kimesneler şehâdetleri ile vekâleti sâbite olan İsmail Çelebi b. Rüstem meclis-i şer‘de sagīrân-ı mezbûrânın hâli ve mâllarına hüccet-i şer‘iye ile nâzırları olan Ramazan Beşe b. Osman nâm kimesne mahzarında bi’l-vekâle ikrâr ve takrîr-i kelâm edip müvekkile-i merkūme vasî İsmihan Hatun bundan akdem sagīrân-ı mezbûrânın mahalle-i merkūmede vâki‘ lede’l-ahâlî ma‘lûmü’l-hudûd mülk arsa-i hâliyeleri üzerinde kendi mâlından yüz bin akçe sarf edip mülkü olmak üzere müceddeden binâ eylediği evler için ancak ol evler benim mülkümdür ol arsa sagīrân-ı mezbûrânın babaları müteveffâ-yı mezbûrdan müntakil mülkleridir benim alâka ve medhalim yokdur dedi dedikde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn.