İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 657 Hüküm no: 770 Orijinal metin no: [98a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hacı Mehmed’in çocukları Mehmed ve Hüseyin’in malını kendisi için harcayan vasîsi İsmihan bt. Osman’dan nâzır Ramazan Beşe’nin hesap sorduğu Dergâh-ı âlî yeniçerilerinin on üç sekbânlar odası neferâtından zikri âtî sagīrlerin mâllarına savb-ı şer‘den nâzır nasb olunan Ramazan Beşe b. Osman nâm kimesne meclis-i şer‘de mahmiye-i İstanbul’da Kızılminâre mahallesi ahâlîsinden olup mukaddemâ vefât eden el-Hâc Mehmed b. Aydın nâm kimesnenin sulbî sagīr oğulları Mehmed ve Hüseyin’in kıbel-i şer‘den mansûbe vasîleri olan vâlideleri İsmihan bt. Osman nâm hatun tarafından ikrâr-ı câ’i’z-zikre vekîl olup zâtını ma‘rifet-i şer‘iye ile ârifân Mustafa Çelebi b. Mehmed ve Ahmed Çelebi b. Mehmed nâm kimesneler şehâdetleri ile vekâleti sâbite olan İsmail Çelebi b. Rüstem mahzarında bi’n-nezâre takrîr-i kelâm edip bundan akdem müteveffâ-yı mezbûr el-Hâc Mahmud fevt oldukda kassâm defteri ile sagīrân-ı mezbûrâna ırsen intikāl eden yüz yirmi bin akçe vasîyy-i mezbûre İsmihan Hatun’a teslîm olundukdan sonra mezbûre İsmihan Hatun bir mikdârını kendi mesârifine sarf ile istihlâk eylediği mesmû‘um olmağla hâlâ bi-tarîkı’t-teftîş mezbûrenin vekîli olan mezbûr İsmail Çelebi’den suâl olunup bi’l-vekâle ikrârı tahrîr olunmak matlûbumdur dedikde gıbbe’s-suâl vekîl-i mezbûr cevâbında fi’l-vâki‘ kazıyye minvâl-i muharrer üzeredir lâkin müvekkile-i merkūme kendi mesârifine sarf eylediği meblağ-ı mezbûru kendi mâlından verip tekmîl edip hâlâ sagīrân-ı mezbûrân yüz yirmi bin akçeleri vasîyy-i merkūme müvekkilem yedinde mevcûddur deyü bi’l-vekâle ikrâr etmeğin ber-minvâl-i muharrer bi’l-vekâle ikrârı bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Beşe b. Mehmed, el-Hâc Mehmed Beşe b. Ali, el-Hâc Ahmed Beşe b. Ali, el-Hâc Mustafa b. Mehmed, Mustafa Beşe b. Mehmed, Ahmed Beşe b. Ali, Mehmed Beşe b. Bayram, Hasan Beşe b. Mahmud, Ahmed Beşe b. İbrahim, Abdi Çelebi b. Hüseyin el-muhzır.