İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 658 Hüküm no: 773 Orijinal metin no: [98b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Nasrullah Çelebi b. Seyyid Yusuf’un Seyyid Salahaddin Çelebi b. Muhyiddin ile ticarî ortaklığına son verdiği Fesh-i şirket bilâ-nizâ‘. Haleb tüccârından olup mahmiye-i İstanbul’da merhûm Vâlide Sultan Hanı’nda müsâfereten sâkin es-Seyyid Nasrullah Çelebi b. es-Seyyid Yusuf meclis-i şer‘-i hatîrde şerîki işbu bâ‘isü’l-kitâb Seyyid Salahaddin Çelebi b. Muhyiddin mahzarında tav‘an ikrâr ve takrîr-i kelâm edip mezbûr Seyyid Salahaddin Çelebi şerîkim olmağın hâlâ fesh-i şirket eylediğimizde beynimizde ma‘lûm Haleb metâ‘ı ve zimem-i nâsda olan akçeleri defter edip bana teslîm ben dahi yedinden alıp kabz edip yedinde bir şey bâkī kalmadığına yemîn dahi vermiş idim ba‘de’l-yevm merkūm Salahaddin Çelebi ile beynimizde ma‘lûm ahz u i‘tâ ve mu‘âmelât-ı şettâya müte‘allika da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc İbrahim Çelebi b. el-Hâc Yusuf, İsmail Ağa b. Abdullah, Hacı İbrahim b. el-Hâc Mehmed et-tavîl, Mehmed Bey b. Mehmed el-cündî, Yusuf Bey b. Şaban Çavuş, Ali b. Abdullah, Abdi Çelebi b. Hüseyin, Muharrirü’l-hurûf Mehmed.