İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 659 Hüküm no: 774 Orijinal metin no: [98b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçerilerin 42. Ağa Bölüğü için vakfedilen paradan Ahmed Beşe b. Mustafa’nın aldığı borcun mütevellisi tarafından tahsil olunduğu Bi-hasebi’t-tevliye iki yüz guruş kabzını ikrâr. Dergâh-ı âlî yeniçerilerinin kırk iki ağa bölüğünün düzeni için mevkūf nükūdun bi’l-fi‘il mütevellîsi olan Mustafa Beşe b. Mahmud nâm râcil meclis-i şer‘de işbu râfi‘u’l-kitâb Ahmed Beşe b. Mustafa mahzarında bi’t-tevliye ikrâr ve takrîr-i kelâm edip hâlâ mütevellîsi olduğum oda-i mezbûr odabaşısı ve vakf-ı mezbûrun mütevellîsi olan Rıdvan Beşe yedinden mezbûr Ahmed Beşe’nin ahz edip zimmetinde edâsı lâzım gelen iki yüz guruşu tevliyetim hasebiyle mezbûr Ahmed Beşe yedinden tamamen alıp kabz edip zimmetinde meblağ-ı mezbûrdan bir akçe ve bir habbe riyâlî bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdüllatif b. Mehmed, el-Hâc Ahmed b. Hasan, Mustafa Beşe kapudan, Abdi Beşe b. Mustafa, Mahmud Beşe b. Abdullah, el-Hâc Mustafa Beşe Burûsî, Ahmed Beşe, Yenibağçeli Ahmed Beşe, Haseki Yusuf Çelebi, İbrahim Beşe kayıkcı, Mehmed Beşe aşcı, el-Hâc Ahmed b. Mustafa, Mehmed Beşe b. Yusuf.