İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 659 Hüküm no: 775 Orijinal metin no: [98b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin ve Mehmed’in mallarından vasîleri ve anneleri İsmihan bt. Osman tarafından Mustafa Beşe b. Mehmed’e verilen 88.000 akçenin tahsil eldiği Vasî yedinden seksen sekiz bin akçe kabzını ikrâr. Mahmiye-i İstanbul’da Kızılminâre mahallesi ahâlîsinden iken mukaddemâ vefât eden el-Hâc Mahmud b. Aydın nâm kimesnenin sulbî sagīr oğulları Hüseyin ve Mehmed’in vâlideleri ve savb-ı şer‘den mansûbe vasîleri İsmihan bt. Osman nâm hatun tarafından ikrâr-ı câ’i’z-zikre vekîl olup zâtını ma‘rifet-i şer‘iye ile ârifân Mustafa Çelebi b. Mehmed ve Ahmed Çelebi b. Mehmed şehâdetleri ile şer‘an vekâleti sâbite olan İsmail Çelebi b. Rüstem ile sagīrân-ı mezbûrânın mâlları üzerine hüccet ile nâzır olan Ramazan Beşe b. Osman meclis-i şer‘de hâfızü’l-vesîka Mustafa Beşe b. Mehmed mahzarında her biri ikrâr ve takrîr-i kelâm edip sagīrân-ı mezbûrânın vasîleri müvekkile-i merkūme İsmihan Hatun târih-i kitâbdan bir sene mukaddem mezbûr Mustafa Beşe’ye sagīrân-ı mezbûrân mâlından seksen sekiz bin akçe ikrâz ve teslîm etmiş idi el-hâletü hâzihî meblağ-ı mezbûru merkūm Mustafa Beşe yedinden alıp kabz edip zimmetinde bir akçe ve bir habbe bâkī kalmadı dediklerinde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Efedi b. Mehmed, el-Hâc Ahmed b. Ali, el-Hâc Mustafa b. Mehmed, Ahmed b. Mehmed, Mustafa Efendi b. Mehmed, Ahmed b. Ali, Mehmed b. Bayram, Hüseyin b. Mehmed, Ahmed b. İbrahim.