İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 660 Hüküm no: 777 Orijinal metin no: [98b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Belkıs bt. Rıdvan’ın terekesi ve mehri hususunda varislerin birbirlerinin zimmetlerini ibra ettikleri Tarafeyni ibrâ. Mahmiye-i İstanbul’da Magnisalı Çelebi mahallesinde sâkine iken bundan akdem vefât eden Belkıs bt. Rıdvan nâm hatunun sulbî kebîr oğlu İbrahim ve sadriye kebîre kızı Âişe bt. Mehmed nâm kimesneler meclis-i şer‘de müteveffât-ı mezbûrenin zevci işbu râfi‘u’l-kitâb Bayram b. Ali nâm kimesne mahzarında her biri ikrâr ve takrîr-i kelâm edip mûrise-i müteveffât-ı mezbûrenin mezkûr Bayram zimmetinde mütekarrir ve ma‘kūdün-aleyh olan bin akçe mehr-i mü’eccelinden bize isâbet eden beş yüz akçe ve cihet-i karz-ı şer‘îden olan bin akçe ki cem‘an bin beş yüz akçe da‘vâsından mezbûr Bayram’ın zimmetini ibrâ-i âm ile ibrâ ve ıskāt eyledik dediklerinde gıbbe’t-tasdîkı’ş-şer‘î mezbûr Bayram meclis-i merkūmda merkūmân İbrahim ve Âişe mahzarlarında ikrâr ve takrîr-i kelâm edip zevcem müteveffât-ı merkūme Belkıs’ın terekesinden kalîl ve kesîr yedlerinde olan eşyâsından ben dahi mezbûrânın zimmetlerini ibrâ ve ıskāt eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’s-sâmin min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Seyyid Mehmed Çelebi b. Nasuh, Osman b. Abdullah, Usta Kalender b. Halil, Mehmed b. Hasan.