.:: İstanbul Kadı Sicilleri ::.


İstanbul Mahkemesi 10 Numaralı Sicil (H. 1072-1073 / M. 1661-1663)
cilt: 51, sayfa: 663
Hüküm no: 782
Orijinal metin no: [99a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mustafa Ağa b. Şaban’ın Rus asıllı kölesi Hasan’ı azat ettiği

[Itk-nâme]

Bi’l-fi‘il silâhdâr ağası olan umdetü’l-emâcid ve’l-a‘yân makbûlü’s-sudûr ve’l-erkân Mustafa Ağa b. Şaban tarafından husûs-ı âti’l-beyânı ikrâra vekîl olup fahrü’l-kuzât Abdurrahman Efendi b. Musa ve Süleyman Çelebi b. Şerefeddin şehâdetleri ile şer‘an vekâleti sâbite olan fahrü’l-müderrisîn Ahmed Efendi b. Hüseyin meclis-i şer‘-i hatîr-i lâzımü’t-tevkīrde ikrâr ve takrîr-i kelâm edip müvekkilim müşârün-ileyh Mustafa Ağa kendiye rıkkını mu‘terif olan işbu râfi‘u’l-kitâb orta boylu açık kaşlı elâ gözlü sarışın Rusiyyü’l-asl Hasan b. Abdullah nâm abd-i memlûkünü hasbeten lillâhi’l-hallâk tahrîr ve i‘tâk ve silk-i ahrâr-ı asliyyîne idrâc ve ilhâk eyledi ba‘de’l-yevm mezbûr Hasan sâir ahrâr-ı asliyyîn gibi hür olup üzerinde velâdan gayrı hakkım kalmadı dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.

Fi’l-yevmi’s-sâlis min-Zilka‘deti’ş-şerîfe li-sene isneteyn ve seb‘în ve elf.

Şuhûdü’l-hâl: Fahrü’l-eimme Süleyman Efendi b. ( ) câmi‘-i Sultan Süleyman, Fahrü’l-akrân Hüseyin Bey b. ( ) el-cündî, Ahmed Efendi b. Hüseyin el-müderris, es-Seyyid el-Hâc Hasan b. Abdullah, Hazînedâr Yusuf Bey el-cündî ve gayruhum mine’l-huzzâr.