İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 663 Hüküm no: 781 Orijinal metin no: [99a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. Hasan’ın İbrahim Ağa b. Mehmed’e emanet olarak bıraktığı parayı aldığı İkrâr-ı meblağ. Fi’l-asl Vilâyet-i Rumeli’nde Avlonya Sancağı’nda Tomorniçe [Tomoriça] kazâsına tâbi‘ Karadepe nâm karye sükkânından olup hâlâ mahmiye-i İstanbul’da Dergâh-ı âlî yeniçerilerinin yirmi dört ağa bölüğüne mahsûs oda ahâlîsinden Hüseyin Beşe b. Hasan nâm kimesne meclis-i şer‘de işbu râfi‘u’l-kitâb hâlâ başçavuş olan umdetü’l-emâcid ve’l-ekârim İbrahim Ağa b. Mehmed tarafından ikrâr-ı âti’l-beyânı tasdîka vekîl olup vekâleti şer‘an sâbite olan Osman Yazıcı b. Ali mahzarında ikrâr ve takrîr-i kelâm edip müvekkil-i mûmâ-ileyh İbrahim Ağa’ya bundan akdem yedi yüz altmış altı kıt‘a riyâlî guruş bi-tarîkı’l-emâne def‘ ü teslîm ol dahi yedimden ahz u kabz etmiş idi hâlâ meblağ-ı mezbûr yedi yüz altmış altı guruş müvekkil-i mûmâ-ileyh yedinden bi’t-tamam ve’l-kemâl ahz u kabz eyledim meblağ-ı mezbûrdan müvekkil-i mûmâ-ileyh yedinde bir akçe ve bir habbe hakkım bâkī kalmadı dedikde mukırr-ı mezbûr Hüseyin Beşe’nin ber-minvâl-i muharrer cârî ve sâdır olan ikrârını vekîl-i mezbûr Osman Yazıcı bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: İbrahim Ağa el-yesârî, İbrahim Yazıcı b. ( ), Osman Beşe b. ( ), Osman b. İlyas, Süleyman b. ( ) el-yesârî, Mehmed Ağa ser-bölük, Mehmed Çelebi b. Abdullah, Usta Abdi b. ( ).