İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 665 Hüküm no: 786 Orijinal metin no: [99b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi b. Hüseyin’in Receb Ağa b. Ali’ye cariye ve eşya bedelinden 380 guruş borcu olduğu İkrâr-ı deyn. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Kehlî Mahmud Efendi b. İbrahim irsâl olunup ol dahi mahmiye-i İstanbul’da Yarhisar mahallesinde sâkin kıdvetü’l-emâsil ve’l-a‘yân el-Hâc Receb Ağa b. Ali’nin menziline varıp zeyl-i kitâbda isimleri mastûr olan Müslimîn huzûrunda akd-i meclis-i şer‘-i şerîf etdikde zümre-i kuzâtdan olup muvakkaten Harput kādısı olan Hüseyin Efendi b. Hüseyin meclis-i ma‘kūd-ı mezbûrda mûmâ-ileyh Receb Ağa mahzarında ikrâr ve i‘tirâf edip mûmâ-ileyh Receb Ağa yedinden müşterâ ve makbûz câriye semeninden iki yüz elli esedî guruş ve nebâtî çuka örf ferâcesi semeninde otuz esedî guruş ve nakid yüz esedî guruş ki cem‘an üç yüz seksen esedî guruş mûmâ-ileyh Receb Ağa’ya mü’eccel ve mev‘ûd bir sene tamamına değin lâzımü’l-edâ ve vâcibü’l-kazâ deynimdir dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘de li-sene isneteyn ve seb‘în ve elf. Şuhûdü’l-hâl: Fahrü’l-kuzât Ahmed Efendi b. İbrahim eş-şehîr bi-Bosnevî, Fahrü’l-kuzât Mahmud Efendi b. el-Hâc Ahmed, Receb b. Mehmed el-müezzin, Esad b. Mesud Efendi, Abdi Çelebi el-müderris, Fahrü’l-akrân Ahmed Ağa, Mehmed Efendi b. İdris ve gayruhum.