İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 665 Hüküm no: 785 Orijinal metin no: [99b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlüd Halife b. Halil’in kendisini haksız yere hapsedip parasını aldığını iddia ettiği Muslı Beşe b. Mustafa ile 1.500 akçe üzerine sulh olduğu Sulh, ibrâ. Vilâyet-i Anadolu’da Seydişehri kazâsına tâbi‘ Dere nâm karye sâkinlerinden Mevlüd Halîfe b. Halil nâm kimesne meclis-i şer‘de Dergâh-ı âlî yeniçerilerinin otuzuncu ağa bölüğüne mahsûs oda ahâlîsinden işbu râfi‘u’l-kitâb Muslı Beşe b. Mustafa mahzarında ikrâr ve takrîr-i kelâm edip zevcem olup gāibetü ani’l-meclis İsmihan bt. Halil nâm hatun beni talâk-ı bâyin ile tatlîk edip yine tezevvüc etdiğimde mezbûr Muslı Beşe sen zevceni yine tezevvüc etmişsin deyü beni ahz u habs edip bi-gayr-ı vech-i şer‘î otuz riyâlî guruşum târih-i kitâbdan on ay mukaddem ahz u kabz etmişdir deyü bundan akdem mezbûr Muslı Beşe’den da‘vâ ve taleb etdiğimde ol dahi inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî tavassut-ı muslihîn ile mezbûr Muslı Beşe benimle bin beş yüz akçe üzerine inşâ-i akd-i sulh eyledikde ben dahi kabûl ve bedel-i sulh olan bin beş yüz akçeyi mezbûr Muslı Beşe yedinden bi’t-tamam ahz u kabz edip husûs-ı mezbûra müte‘allika de‘âvîden mezbûr Muslı Beşe’nin zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘deti’ş-şerîfe li-sene 1072.