İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 672 Hüküm no: 796 Orijinal metin no: [101a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Rıfaizâde Mehmed Efendi’in merhum Müezzinzâde Ahmed Efendi’nin zimmetinde kalan alacağını varislerinden tahsil ettiği İsbât-ı elli guruş ve yemîn ve ba‘dehû vasî yedinden kabzını ikrâra ikrâr. Mahmiye-i İstanbul’da Harâcî Muhyiddin mahallesinde sâkin kıdvetü kuzâtü’l-İslâm Rıfâîzâde Mehmed Efendi meclis-i şer‘de mahmiye-i mezbûrede Çıkrıkcı Kemâl mahallesinde sâkin iken bundan akdem vefât eden Müezzinzâde Ahmed Efendi’nin sulbî sagīr oğulları Hamdi ve Mehmed ve sulbiye sagīre kızı Hadice’ye kıbel-i şer‘den mansûb vasîleri olan kıdvetü kuzâtü’l-İslâm Muslı Efendi b. Ebûbekir mahzarında üzerine da‘vâ ve takrîr-i kelâm edip müteveffâ-yı mezbûr Ahmed Efendi bundan akdem hayatında elli riyâlî guruş ikrâz ve teslîm ol dahi iktirâz ve tesellüm eyledikden sonra kable’l-edâ vefât edip muhallefâtına vasîyy-i mezbûr bi-hasebi’l-vesâye vaz‘-ı yed etmeğin suâl olunup müteveffâ-yı mezbûrun terekesinden alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine talebe olundukda udûl-i ricâl-i Müslimînden olup mahmiye-i mezbûrede Şah Huban mahallesinde sâkin Mehmed Çelebi b. Süleyman ve Mustafa b. Şaban nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i mezbûr müteveffâ-yı mezbûr hâl-i hayatında bizim huzûrumuzda bundan akdem elli riyâlî guruş ikrâz ve teslîm ol dahi iktirâz ve tesellüm ve kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra mûmâ-ileyh Mehmed Efendi müteveffâ-yı mezbûrdan sıhhatinde meblağ-ı mezbûru küllen veyâ ba‘zan ahz u istifâ veyâ turûk-ı şer‘iyeden bir tarîk ile zimmetini ibrâ etmediğine yemîn teklîf olundukda ol dahi alâ-mâ hüve’l-mesûl halfü billâhi te‘âlâ etmeğin mûcebince meblağ-ı mezbûru mûmâ-ileyh Mehmed Efendi’ye müteveffâ-yı mezbûrun terekesinden edâya vasîyy-i mezbûr Muslı Efendi’ye tenbîh olundukdan sonra mûmâ-ileyh Mehmed Efendi meclis-i mezbûrda vasîyy-i mezbûr mahzarında ikrâr ve i‘tirâf edip bâlâda zikri mürûr eden elli riyâlî guruşu vasîyy-i mezbûr Muslı Efendi yedinden bi’t-tamam ve’l-kemâl ahz u kabz eyledim huzzâr-ı mezbûrûnun zimmetlerinde bir akçe hakkım bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fi’l-yevmi’s-sâlis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Keşfî Mustafa Efendi b. Muharrem el-kâtib, el-Hâc Yusuf b. Musa el-muhzır, Ali Çelebi b. ( ) el-muhzır, Mustafa b. Ahmed el-muhzır, Rasûl Bey b. Rıdvan el-muhzır.