İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 671 Hüküm no: 795 Orijinal metin no: [100b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ali Beşe b. Mustafa’nın terekesinden herhangi bir şey almadıklarına dair merhumun hizmetkârları Musa b. Hasan ile Ahmed b. Abdullah’ın yemin ettikleri Yemîn. Bundan akdem Boğdan Vilâyeti’nde vefât eden Ali Beşe b. Mustafa’nın verâseti ve hasran vârisi olan Ahmed b. Mustafa nâm kimesne mahfil-i kazâda müteveffâ-yı mezbûrun hizmetkârı Musa b. Hasan ile Ahmed b. Abdullah nâm kimesne mahzarlarında üzerlerine da‘vâ ve takrîr-i kelâm edip li-ebeveyn karındaşım olan mezbûr Ali Beşe vilâyet-i mezbûrede vefât eyledikde mezbûrân Musa ve Ahmed yanında olmağla karındaşım mezbûr Ali Beşe’nin metrûkâtından bir semmûr kürk ve bir yeşil çukaya kaplı nâfe kürk ve bir benefş yelek ve bir cevâhir kuşak ve bir sîm raht kuşak ve bir sırt kolan kuşak ve bir altın bilezik ve iki sîm raht ve bir çerkes raht ve iki sîm resme ve bir sîm üsküf ve iki sîm balta ve iki sîm hançer ve iki gümüşlü bıçak ve bir sîm zincirle tîrkeş ve bir kırmızı diz çakşırı ve bir mor diz çakşırı ve bin kırk emânet guruş ve sekiz yüz kendi guruşu ve bir leğen ve bir kahve ibriği ve iki el ibriği ve iki çift garâr ve üç kilim ve bir yeşil kebe ve bir müsta‘mel kebe ve bir ihrâm ve üç yemenî yorgan ve üç kadife yasdık ve bir kadife minder ve iki eğer ve bir çift küt üzengi ve iki ibrişim tapkur ve iki çift üzengi ve dört çift çuval ve on mücesseme ve bir sepet içinde adedi nâ-ma‘lûm kumaş ve bir mikdâr inci ve bir kadife kavuk ve bir sîm at hamâyili ve defa bir sırmalı kuşak ve iki mercan tesbih ve bir boylu tüfenk ve bir tabancalı cevherdâr tüfenk ve bir yaldızlı kılıç ve bir kara kılıç ve bir at ve seyishâne ve üç Halebî perde ve bir sineklik ve sâir eşyâsını ahz u kabz eylemişlerdir suâl olunup verâsetim hasebiyle bana alıverilmek taleb eylerin dedikde gıbbe’s-suâl mezbûrân Musa ve Ahmed cevâblarında müdde‘î-i mezbûrun cümle müdde‘âlarını inkâr eylediklerinde müdde‘î-i mezbûrdan sıdk-ı makālini mübeyyine beyyine taleb olundukda ityân-ı beyyineden izhâr-ı acz edip istihlâf etmeğin müdde‘î-i mezbûrun karındaşı mezbûr Ali Beşe vefât eyledikde silk-i mülkünde olan eşyâ-i merkūmeyi ahz u kabz etmediklerinde mezbûrân Musa ve Ahmed’e yemîn teklîf olundukda onlar dahi alâ-vefki’l-mesûl, yemîn teklîf olundukda onlar dahi alâ-mâ hüve’l-mesûl, halfü billâhi te‘âlâ eylediklerinde bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed b. Ramazan, Mustafa b. İsa, Mustafa b. Mehmed, Veli b. Mahmud, Hasan b. Mustafa, Rasûl b. Rıdvan.