İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 673 Hüküm no: 798 Orijinal metin no: [101a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Sirkecibaşı Mehmed Ağa’nın vasiyeti üzerine köle ve cariyeleri olan Şahin, Canan ve Gülüstan’a üçer bin akçe verildiği Husûs-ı âti’l-beyânın mahâllinde tahrîri iltimâs olunmağın kıbel-i [şer‘-i] mutahhardan Mehmed Efendi irsâl olunup ol dahi mahmiye-i İstanbul’da Âşık Paşa mahallesinde Yahya Paşazâde Sarayı demekle ma‘rûf menzile varıp zeyl-i rakīmde mastûrü’l-esâmî Müslimîn huzûrunda akd-i meclis-i şer‘-i kavîm eyledikde bundan akdem maktûlen vefât eden Sirkecibaşı Mehmed Ağa’nın mu‘takı Şahin nâm kimesne ve mu‘takaları Canan ve Gülistan nâm hatunlar meclis-i mezbûrda müteveffâ-yı mezbûrun muhallefâtına vâzı‘atü’l-yed olan zevce-i metrûkesi Âişe bt. Abdullah nâm hatun tarafından tasdîk-i âtîye vekîli ve hâlâ zevci olan Hüseyin Ağa b. Abdullah nâm kimesne mahzarında her biri ikrâr-ı tâm ve takrîr-i kelâm edip müteveffâ-yı mezbûrun mâlından her birimize üçer bin akçe verilmek üzere vasiyyet edip sülüs-i mâlı dahi vefâ etmekle her birimiz üçer bin akçeyi mezbûr Âişe Hatun yedinden bi’t-tamam ahz u kabz eyledik zimmetinde bir akçe ve bir habbe bâkī kalmadı dediklerinde gıbbe’t-tasdîk vâki‘ hâli mevlânâ-yı mezbûr mahâllinde tahrîr ve ba‘dehû meclis-i şer‘a gelip ma‘an irsâl olunun Muharrem b. Abdullah ile alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Mahmud b. Abdullah, Ali Ağa b. Sefer, Şaban Efendi b. Hasan, Memi Efendi b. Mehmed el-müderris, el-Hâc Mustafa b. Hızır, Ömer Ağa b. Osman, Hasan Efendi b. Şaban.