İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 674 Hüküm no: 799 Orijinal metin no: [101a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tosyalı bazı kişilerin tomruk biçme ücretlerini vermediklerini iddia ettikleri Mehmed Ağa b. Kasım ile dört bin akçe üzerine sulh oldukları Sulh, ibrâ. Vilâyet-i Anadolu’da Tosya kazâsına tâbi‘ Kayı nâm karye sükkânından Mehmed b. Hasan ve Eyüb b. Rasûl asâleten ve Mahmud b. el-Hâc Kasım kendi tarafından asâleten ve yine karye-i mezbûre sükkânından İbrahim b. Hacı Hamza ve karındaşı Halil ve Satılmış b. Muharrem ve Halil b. Ramazan Sofu ve Deli Mehmed b. Veli ve Mustafa b. Hasan Sofu taraflarından husûs-ı âti’z-zikre vekîl olup mezbûrân Mehmed b. Hasan ve Eyüb b. Rasûl şehâdetleri ile şer‘an vekâleti sâbite olmağın vekâleten meclis-i şer‘-i hatîrde zikrolunan Tosya sâkinlerinden fahrü’l-akrân râfi‘u’l-kitâb Mehmed Ağa b. Kasım mahzarında ikrâr ve takrîr-i kelâm edip bundan akdem mezbûr Mehmed Ağa zikrolunan Tosya’da her biri yirmi beşer akçeden yirmi bin akçeye sekiz yüz tomruğu tahta biçmek için bizim ile kavl ve biz dahi zikrolunan sekiz yüz tomruğu biçdiğimizden sonra meblağ-ı mezbûrdan tomruk başına beşer akçeden dört bin akçesin bize def‘ ü teslîm edip tomruk başına yirmi beşer akçeden on altı bin akçesi zimmetinde bâkī kalmağın bundan akdem meblağ-ı bâkī-i merkūmu mezbûr Mehmed Ağa’dan asâlet ve vekâletimiz hasebiyle da‘vâ ve taleb etmekle beynimizde münâza‘ât-ı kesîre câriye olmuş idi el-hâletü hâzihî beynimize Müslimûn ve muslihûn vesâteti ile mezbûr Mehmed Ağa da‘vâ-yı meşrûhamızdan bizimle dört bin akçe üzerine inşâ-i akd-i sulh eyledikde biz dahi sulh-ı mezbûru asâlet ve vekâletimiz hasebiyle sulh-ı mezbûru kabûl ve bedel-i sulh olan meblağ-ı mezbûru tamamen mezbûr Mehmed Ağa yedinden alıp kabz eyledik ba‘de’l-yevm husûs-ı mezbûra müte‘allika da‘vâdan mezbûr Mehmed Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Abdülkerim b. Halil, Ali Beşe b. İbrahim, Mehmed b. Mehmed, Mehmed b. Mahmud, Dâ‘î Ahmed Çelebi, Mustafa b. Ahmed.