İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 675 Hüküm no: 801 Orijinal metin no: [101b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Üveys Mescidi Vakfı’nın eski ve yeni mütevellileri arasında devir işlemlerinin yapıldığı Mahmiye-i İstanbul’da Mustafa Bey ve Bostancı Mahmud ve Sâliha Hatun ve Fâtıma Hatun ve Sitti Hatun ve Kamer Hatun nâm sahibü’l-hayrlar mahmiye-i mezbûrede Hoca Üveys Mescid-i Şerîfi’nin mühimmâtına vakf eyledikleri nükūda hâlâ mütevellî olan Siyavuş Bey b. Abdullah meclis-i şer‘de evkāf-ı mezkûreye sâbıkā mütevellî olan işbu râfi‘u’l-kitâb es-Seyyid Mehmed b. es-Seyyid Yusuf mahzarında bi’t-tevliye ikrâr ve i‘tirâf edip mezbûr es-Seyyid Mehmed Çelebi tevliyet-i mezbûreden azl ve yerine ben mütevellî olmağla hâkim-i muvakkı‘-ı sadr-ı kitâb hazretleri huzûrunda talebimle muhâsebesi görüldükde cümle usûl-i emvâl-i evkāf-ı mezbûre her biri sekizer dirhem olmak üzere dört yüz ve yedişer dirhem olmak üzere beş yüz guruş ki cem‘an dokuz yüz riyâlî guruş olup meblağ-ı mezbûrun altı yüz yetmiş riyâlî guruş zimem-i nâsda merbûh bulunmağla yerlü yerinden bana gösterip ben dahi kabûl eylediğimden sonra her biri yedişer dirhem olmak üzere iki yüz otuz riyâlî guruş nakid bana teslîm ben dahi bi’t-tevliye kabz ve tesellüm eylemişdim min-ba‘d usûl-i emvâl-i evkāf-ı mezbûreden ve irbâhdan mezkûr es-Seyyid Mehmed Çelebi kıbelinde vechen mine’l-vücûh bir akçe ve bir habbe bâkī kalmadı dedikde gıbbe’t-tasdîk mâ-vaka‘a bi’t-taleb ketb olundu. Fi’l-hâmis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdi Beşe b. Receb, Hasan Koca b. Nasuh, Hacı Cafer b. Abdullah, Mustafa Beşe b. Abdullah, Hacı Musa b. Himmet, Mahmud Halîfe b. Şaban, Mehmed Ağa b. Mustafa, Derviş Beşe b. ( ), Mervan Ali b. ( ), Mehmed Efendi b. Mehmed el-imâm, Pir Mehmed Efendi el-kādî.