İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 676 Hüküm no: 802 Orijinal metin no: [101b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hatun bt. Sinan’ın gönderci dükkânını Süleyman Ağa b. Mehmed’e sattığı Mübâya‘a-i dükkân. Mahmiye-i İstanbul’da Haraçcı Muhyiddin mahallesinde sâkine mefharu’l-muhadderât Râbia Hatun bt. Sinan meclis-i şer‘de işbu kitâbın sahibi umdetü’l-emâcid ve’l-ekârim zevci Süleyman Ağa b. Mehmed mahzarında ikrâr ve i‘tirâf edip mahmiye-i mezbûrede Magnisalı Çelebi mahallesinde vâki‘ bir tarafı merkūm Süleyman Ağa mülküne ve bir tarafı Sarrâcbaşı Vakfı’na ve bir tarafı İbrahim Beşe mülküne ve bir tarafı tarîk-i âmma müntehî birbirine muttasıl iki bâb mülk gönderci dükkânımı bi-safkatin vâhidetin merkūm Süleyman Ağa’ya bâtten yirmi bin akçeye bey‘ ve teslîm ol dahi vech-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûru yedinden bi’t-tamam ahz u kabz eyledim ba‘de’l-yevm zikrolunan iki bâb dükkân mesfûr Süleyman Ağa’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Efendi el-müderris, Keşfî Mustafa Efendi, Abdi b. Hüseyin, Muharrirü’l-hurûf Ahmed Efendi, Hasan Beşe, Ahmed Bey b. Abdülkerim.