İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 692 Hüküm no: 826 Orijinal metin no: [104b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi b. Süleyman’ın kendisinden kanunsuz olarak para aldığını iddia etdiği Hezargrad Kadısı Ömer Efendi ile sulh olduğu Sulh. Vilâyet-i Rumeli’nde Hezargrad kasabasında İbrahim Paşa mahallesinde sâkin olup bi’l-fi‘il merhûm-ı mezbûr İbrahim Paşa Vakfı’na mütevellî olan fahrü’l-müderrisîn Ahmed Efendi b. Süleyman meclis-i şer‘de işbu bâ‘isü’l-kitâb hâlâ kasaba-i mezbûre kādısı umdetü kuzâtü’l-İslâm zübdetü vülâti’l-enâm Ömer Efendi b. ( ) tarafından ikrâr-ı âti’l-beyânı tasdîka vekîl olup Hasan Ağa b. Hüseyin ve Mehmed Beşe b. İsa şehâdetleri ile şer‘an vekâleti sâbite olan fahrü’l-kuzât Mehmed Efendi b. İbrahim mahzarında ikrâr ve takrîr-i kelâm edip müvekkil-i mûmâ-ileyh Ömer Efendi hâlâ kasaba-i mezbûre kādısı olup benden bi-gayr-ı vech-i şer‘î kırk bin akçe aldı deyü meblağ-ı mezbûru müvekkil-i mûmâ-ileyh Ömer Efendi’den da‘vâ ve taleb eylediğimde beynimizde münâza‘ât-ı kesîre vâkı‘a olmuşdu el-hâletü hâzihî tavassut-ı muslihûn ile da‘vâ-yı mezbûremden beş bin nakd-i râyic fi’l-vakt akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr beş bin akçeyi müvekkil-i mûmâ-ileyh Ömer Efendi yedinden bi’t-tamam ve’l-kemâl ahz u kabz eyledim ba‘de’l-yevm husûs-ı mezbûra müte‘allika benden asâleten ve vekâleten da‘vâ dahi sudûr ederse lede’l-hükkâm mesmû‘a olmasın dedikde vâki‘u’l-hâl gıbbe’t-tasdîk bi’t-taleb ketb olundu. Fi’s-sâdis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’s-sâdât es-Seyyid Mustafa Efendi, İbrahim Efendi el-kādî, es-Seyyid Ahmed Efendi el-kādî, Şeyh Mehmed Efendi b. ( ), Mehmed Efendi b. Şeref Mehmed, Pir Mehmed Efendi el-kādî, Şeyh Halil Efendi el-vâiz, Mehmed Efendi el-imâm.