İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 693 Hüküm no: 828 Orijinal metin no: [104b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbaz Dimitri v. İstemad’ın tezgâhtarı Yorgi’de olan alacağına kefil olmadığına dair Yusuf Çavuş’un yemin ettiği Kefîl olmadığına yemîn. Habbâz tâifesinden Dimitri v. İstemad nâm zimmî mahfil-i kazâda işbu bâ‘isü’l-kitâb Yusuf Çavuş b. ( ) mahzarında üzerine da‘vâ ve takrîr-i kelâm edip mezbûr Yusuf Çavuş, destgâhdârım olan gāib ani’l-meclis Yorgi nâm zimmî zimmetinde cihet-i deyn-i şer‘îden hüccet-i şer‘iye ile ilzâm olunan yirmi sekiz bin iki yüz doksan akçe hakkım tahsîli için mübâşir ta‘yîn olunup meblağ-ı mezbûrdan üç yüz akçesini tahsîl ve bana teslîmden sonra bâkī kalan yirmi yedi bin dokuz yüz doksan akçesine mezbûr Yusuf Çavuş kefâlet-i sahîha ile kefîl bi’l-mâl olmuş idi hâlâ kefâleti hasebiyle meblağ-ı mezbûru merkūmdan taleb ederim suâl olunsun dedikde gıbbe’s-suâl akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘î-i mezbûrun gāib ani’l-meclis Yorgi zimmetinde olan yirmi yedi bin dokuz yüz doksan akçe deynine kefâlet-i sahîha ile kefîl bi’l-mâl olmadığına mezbûr Yusuf Çavuş’a yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince müdde‘î-i mezbûr Dimitri bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Efendi el-mübâşir, Mehmed Çavuş b. Abdi, Gazanfer b. Tevekkül, Şükrullah Çelebi b. Mustafa, Mahmud b. İsmail.