İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 694 Hüküm no: 829 Orijinal metin no: [105a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ Receb b. Durmuş’un Hıristodori v. Yanaki’ye emanet bıraktığı malın kaybolmasından dolayı aralarında çıkan anlaşmazlıkta sulh olduğu Yemîn. Debbağ tâifesinden Receb b. Durmuş nâm şâbb-ı emred meclis-i şer‘de tâife-i mezbûreden bâ‘isü’s-sifr Hıristodori v. Yanaki nâm zimmî muvâcehesinde ikrâr ve takrîr-i kelâm edip târih-i kitâbdan yirmi gün mukaddem silk-i mülkümde olan eşyâmdan bir mâ’î çuka Londra yelek ve bir şîrvanî ve bir ibrişim peştemal ve bir gömlek ve bir kırmızı bogası çintiyan ile dört kıt‘a münakkaş makramelerimiz bir heğbe içinde mezbûr Hıristodori yedine dükkânda hıfz etmek üzere emânet vaz‘ ve teslîm edip ba‘de eşyâ-i mezkûreyi mezbûrdan taleb eylediğimde mezbûr Hıristodori târih-i kitâbdan on beş gün mukaddem dükkânım açılıp eşyâ-yı mezkûre zâyi‘ oldu deyü cevâb vermekle mezbûrun te‘addîsini mübeyyine beyyineden aczim zâhir olmağın mezbûr Hıristodori yemîn etmek sadedinde olmağla beynimizde münâza‘ât-ı kesîre vâkı‘a olmuş idi el-hâletü hâzihî vesâtet-i muslihîn ile mezbûr Hıristodori da‘vâ-yı mezkûreden benimle sekiz yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezkûru mezbûr Hıristodori yedinden tamamen alıp kabz eyledim min-ba‘d husûs-ı mezbûra müte‘allika mezkûr Hıristodori ile da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Seyyid Mehmed Efendi b. Osman, Mahmud Beşe b. Hızır, Musa Beşe b. Mehmed, Şükrullah Çelebi b. Mustafa, Ramazan b. Mehmed.