İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 698 Hüküm no: 833 Orijinal metin no: [105b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Abdullah’ın kiremit bedelinden İbrahim Efendi zimmetinde dört bin yüz elli akçe alacağı olduğu İsbât-ı da‘vâ-yı kiremid. Mahmiye-i İstanbul’da el-Hâc İlyas mahallesinde sâkin fahrü’l-akrân Ahmed Bey b. Abdullah nâm kimesne mahfil-i kazâda İbrahim Efendi b. ( ) mahzarında üzerine da‘vâ ve takrîr-i kelâm edip mezbûr İbrahim Efendi’de târih-i kitâbdan beş ay mukaddem her tânesi birer akçeye yedimden müşterâ ve makbûz on bin kiremid semeninden on bin akçe hakkım olup beş bin beş yüz elli akçesini mezbûrdan ahz edip zimmetinde bâkī dört bin dört yüz elli akçe hakkım kalmışdır. Suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahalle-i mezbûrede sâkin Süleyman b. Davud ve İbrahim Bey b. Mustafa ve Mehmed b. Mahmud nâm kimesne li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr İbrahim Efendi müdde‘î-i mezbûr yedinden târih-i kitâbdan beş ay mukaddem tânesi birer akçeye huzûrumuzda on bin kiremid ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr dört bin dört yüz elli akçeyi müdde‘î-i mezbûr Ahmed Bey’e edâ ve teslîme mezbûr İbrahim Efendi’ye tenbîh birle mâ-vaka‘a bi’t-taleb ketb olundu. Fi’s-sâdis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Çelebi el-muhzır, Şaban Beşe sarrâc, Ahmed b. Abdullah, Abdi b. Hüseyin, Rasûl b. Rıdvan, Veli b. Mahmud.