İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 699 Hüküm no: 835 Orijinal metin no: [106a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. İbrahim’in merhum Osman b. Murad’da 1.000 akçe alacağı olduğunu şahitlerle ispat ettiği İsbât-ı meblağ: 1000. Mahmiye-i İstanbul’da Ali Paşa mahallesinde sâkin işbu râfi‘u’l-kitâb Mustafa b. İbrahim nâm kimesne mahfil-i kazâda bundan akdem mahalle-i mezbûrede sâkin iken vefât eden Osman b. Murad nâm kimesnenin veresesi ve hasran vârisi ve muhallefâtına vâzı‘u’l-yed olan babası mezbûr Murad b. el-Hâc Veli nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr Osman bundan akdem bi-tarîkı’l-emâne bin akçe def‘ ü teslîm ol dahi ahz u kabz etmiş idi kable’l-ahz mezbûr Osman vefât etmeğin meblağ-ı mezbûr bin akçemi hâl-i hayatında da‘vâ ve taleb etdiğimde huzûr-ı şuhûdda ikrâr dahi etmişdir hâlâ suâl olunup tereke-i vâfiyesinden alıverilmek murâdımdır dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahalle-i mezbûre sâkinlerinden el-Hâc Süleyman b. el-Hâc Said ve Ömer b. Sefer nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Mustafa müteveffâ-yı mezbûr Osman’dan hâl-i hayatında bi-tarîkı’l-emâne vaz‘ ve teslîm eylediği bin akçeyi taleb eylediğinde müteveffâ-yı mezbûr Osman meblağ-ı mezbûr bin akçe hâlâ bi-tarîkı’l-emâne benim yedimdedir deyü ikrâr ve bizi işhâd eyledi ve mezbûr Murad müteveffâ-yı mezbûrun muhallefâtına dahi vâzı‘u’l-yeddir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr bin akçeyi müdde‘î-i mezbûr Mustafa’ya edâ ve teslîme mezbûr Murad’a tenbîh birle mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Beşe b. Şaban, Mahmud Beşe b. Ramazan, Şükrullah b. Mustafa, Abdi Çelebi b. Hüseyin, Baba Rasûl b. Rıdvan.