İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 700 Hüküm no: 836 Orijinal metin no: [106a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Sinan’ın Hacı Mustafa Ağa b. Ahmed aleyhine açtığı miras davasında iddiasını ispat edemediği Yemîn. Hadîka-i hâssa bostancılarından olup bundan akdem hâcc-ı şerîfden gelir iken vefât eden Kireçcibaşı Ahmed Ağa’nın verâseti Vilâyet-i Rumeli’nde Bihlişte kazâsında Maniska nâm karyede sâkine olan vâlidesi Hadîce bt. Ömer ve li-ebeveyn kız karındaşı Ümmügülsüm bt. Sinan ve li-ebeveyn ammi Murad b. Muslı’ya münhasıra olduğu şer‘an mütehakkık oldukdan sonra mezbûr Ümmügülsüm tarafından Bihlişte sâkinlerinden olup mezbûr Ümmügülsüm’ün zâtını ma‘rifet-i şer‘iye ile ârifân olan Mehmed b. Ali ve Mustafa b. Sinan şehâdetleri ile şer‘an vekâleti zâbite olan Süleyman b. Mustafa nâm kimesne meclis-i şer‘de hâssa bostancılardan işbu kitâbın sahibi fahrü’l-emâsil ve’l-akrân el-Hâc Mustafa Ağa b. Ahmed mahzarında bi’l-vekâle üzerine da‘vâ ve takrîr-i kelâm edip müvekkilemin mûrisi müteveffâ-yı mezbûr Ahmed Ağa’nın bundan akdem Galata muzâfâtından Ortaköy’de vefât eden İdris Ağa zimmetinde kırk bin akçe hakkı olup ba‘de vefâtihî muhallefâtını zevce-i metrûkesi Fâtıma Hatun kabz eylemeğin meblağ-ı mezbûrdan altı sehimde üç sehm nısf hissesine isâbet eden on dokuz bin dokuz yüz doksan sekiz akçemi mezbûre Fâtıma’dan da‘vâ ve taleb eylediğimde meblağ-ı mezbûru mukaddemâ vekîlim bostancı-i mezbûr el-Hâc Mustafa’ya verdim ondan taleb eyle demeğin ben dahi müvekkilemin hissesini mezbûr el-Hâc Mustafa’dan taleb ederim suâl olunsun dedikde gıbbe’s-suâl mezbûr el-Hâc Mustafa cevâbında mukaddemâ mezbûre Fâtıma Hatun’un vekîli olduğunu ikrâr edip lâkin meblağ-ı mezbûr kırk bin akçeyi müvekkile-i mezbûre Fâtıma yedinden ahz u kabz eylediğini ve aslını inkâr edicek vekîl-i mezbûr Süleyman’dan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin meblağ-ı mezbûr kırk bin akçeyi müvekkilesi mezbûre Fâtıma yedinden ahz u kabz etmediğini mezbûr el-Hâc Mustafa Ağa’ya yemîn teklîf olundukda ol dahi alâ-vefki’l-mesûl halfü billâhi’l-aliyyü’l-azîm etmeğin bilâ-beyyine mu‘ârazadan mezbûr Süleyman men‘ birle mâ-vaka‘a bi’t-taleb ketb olundu. Fi’l-yevmi’s-sâlis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-akrân Mehmed Ağa b. Mahmud ser-muhzırân, el-Hâc Ahmed b. Mahmud, Dâ‘î Ahmed Çelebi, Mehmed b. Ramazan, Veli b. Mahmud.