İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 708 Hüküm no: 848 Orijinal metin no: [107b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muslı Beşe b. Mehmed’in borç karşılığında rehine koyduğu menzilinin borcunu ödemesi üzerine kendisine iadesi Fekk-i rehin. Mahmiye-i İstanbul’da Hibetullah nâm hatunun nükūd-ı mevkūfesine bi’l-fi‘il mütevellî olan eş-Şeyh Mustafa Efendi b. Yusuf tarafından husûs-ı câ’i’z-zikri ikrâra vekîl olup Muharrem b. Hüseyin ve Mustafa Beşe b. Abdullah nâm kimesneler şehâdetleri ile şer‘an vekâleti sâbite olan fahrü’l-kuzât Hüseyin Efendi b. Ali meclis-i şer‘de mahmiye-i mezbûrede İskender Paşa mahallesinde sâkin işbu râfi‘u’l-kitâb Muslı Beşe b. Mehmed mahzarında bi’l-vekâle ikrâr ve takrîr-i kelâm edip mezbûr Muslı Beşe müvekkilim mezbûr Mustafa Efendi’den bundan akdem vakf-ı mezbûr mâlından olmak üzere her biri altı dirhem gelir üç yüz yirmi beş riyâlî guruş olup meblağ-ı mezbûr mukābelesinde silk-i mülkünde olup mahalle-i mezbûrede vâki‘ bir tarafdan Osman Çelebi b. Ahmed mülküne ve bir tarafdan Mahmud Subaşı mülküne ve bir tarafdan yeniçeri odalarına ve bir tarafdan tarîk-i âm ile mahdûd olan mülk menzilini rehin vaz‘ ve teslîm eylemişdi el-hâletü hâzihî müvekkilim şeyh-i merkūm Mustafa Efendi meblağ-ı mezbûrdan iki yüz guruşunu ahz eyledikden sonra menzil-i mezbûru rehniyetden fek eyledi dedikde vekîl-i mezbûru cârî olan kelimâtında mezbûr Muslı Beşe bi’l-muvâcehe tasdîk ve bi’l-müşâfere tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Süleyman Efendi el-kādî, Ahmed b. Abdullah, Ahmed Beşe b. ( ), Abdurrahman Efendi b. Abdülvehhab, Mahmud Odabaşı, Vekîlharc Kurd Beşe, Küçük Mustafa Beşe, Mehmed Beşe [b.] Mustafa.