İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 707 Hüküm no: 847 Orijinal metin no: [107b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muslı Beşe b. Mehmed’in Birinci Yeniçeri Ağa Bölüğü’ne mahsus vakıftan borç aldığı İstiğlâl. Mahmiye-i İstanbul’da İskender Paşa mahallesinde sâkin Muslı Beşe b. Mehmed nâm râcil meclis-i şer‘de Dergâh-ı âlî yeniçerilerinin birinci ağa bölüğüne mahsûs oda mühimmâtı için mevkūf nükūda bi’l-fi‘il mütevellî olan işbu râfi‘u’l-kitâb Yusuf Beşe b. Mehmed nâm râcil mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Osman Çelebi b. Ahmed mülküne ve bir tarafdan Mehmed Subaşı mülküne ve bir tarafdan yeniçeri odalarına ve bir tarafdan tarîk-i âmma müntehî olan mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mütevellî-i mezbûr Yusuf Beşe’ye her biri altışar dirhem gelir iki yüz riyâlî guruşa istiğlâl-i şer‘î tarîki üzere bey‘ ve teslîm ol dahi mal-ı vakf-ı mezbûr ile yine vakıf için ber-minvâl-i muharrer iştirâ ve kabûl ve tesellüm edip semeni olan iki yüz riyâlî guruşu tamamen mütevellî-i mezbûr yedinden alıp kabz eylediğimden sonra yine menzil-i mezbûru ba‘de’t-tahliyeti’ş-şer‘iye ve’t-tekābuzi’l-mer‘î târih-i kitâbdan altı ay tamamına dek ( ) guruş ücret-i mü’eccele-i mev‘ûde ile mütevellî-i mezbûr Yusuf Beşe’den istîcâr ve tesellüm ve kabûl ol dahi ber-minvâl-i muharrer bana îcâr ve teslîm eyledikde gıbbe mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Odabaşı b. Ömer, Vekîlharc Kurd Beşe b. Abdullah, Küçük Mustafa Beşe er-râcil, Mehmed b. Mustafa.