İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 710 Hüküm no: 852 Orijinal metin no: [108a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed b. Halife’nin küçük çocukları Fâtıma ve Neslihan’a günlük beşer akçe nafaka ödemesi Nafaka. Mahmiye-i İstanbul’da Haydar Ağazâde mahallesi sâkinelerinden Azize bt. Nasuh mahfil-i kazâda zevc-i mutallıkı el-Hâc Mehmed b. Halîfe nâm kimesne mahzarında üzerine da‘vâ ve takrîr-i kelâm edip zevcim mezbûr el-Hâc Mehmed târih-i kitâbdan üç gün mukaddem talâk-ı bâyin ile beni tatlîk eylemişdi hâlâ zimmetinde mütekarrir olan dört bin akçe mehr-i mü’eccelimi ve nafaka-i iddet-i ma‘lûmem ve me’ûnet-i süknâmı taleb ederim suâl olunsun dedikde gıbbe’s-suâl merkūm el-Hâc Mehmed cevâbında müdde‘iye-i mezbûre dört bin akçe mehr-i mü’eccel ile zevcesi olup minvâl-i muharrer üzere tatlîk etdiğini tav‘an ikrâr etmeğin alâ-ikrârihî müdde‘iye-i mezbûre Azize’ye mehr-i mü’ecceli olan dört bin akçeyi ve külle yevm kadr-ı kifâye nafakasını edâ ve teslîme mezbûr el-Hâc Mehmed’e tenbîh olundukdan sonra hâkim-i muvakkı‘-ı sadr-ı kitâb hazretleri mezbûre Azize’nin talebi ile hâlâ hacr ve terbiyesinde olup merkūm el-Hâc Mehmed’in firâşından hâsıla olan Fâtıma ve Neslihan nâm sagīrelerin nafakaları için babaları merkūm el-Hâc Mehmed üzerine her birine külle yevm beşer akçe farz ve takdîr ve nafaka-i mezbûreyi sagīretân-ı mezbûretâna sarfa ve hîn-i zarûretde istidâneye mezbûre Azize’ye izin verip mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Halebîzâde Mehmed Çelebi, el-Hâc Ahmed kethudâ, Osman Çelebi, Veli b. Mahmud, Mustafa b. Ahmed, Rasûl b. Rıdvan, Mehmed b. Ramazan.