İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 711 Hüküm no: 853 Orijinal metin no: [108a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Sirkeci Mehmed Ağa’nın Rus asıllı Canan ve Gülistan adlı cariyelerini hayatta iken azat ettiğinin şahitlerle ispat olunduğu İsbât-ı ıtk. Mahmiye-i İstanbul’da Âşık Paşa mahallesi sâkinelerinden açık kaşlı gök elâ gözlü orta boylu Rusiyyetü’l-asl işbu râfi‘atü’l-kitâb Canan bt. Abdullah ve açık kaşlı kara gözlü orta boylu Rusiyyetü’l-asl Gülistan bt. Abdullah meclis-i şer‘de bundan akdem maktûlen vefât eden Sirkecibaşı Mehmed Ağa’nın zevce-i metrûkesi Hadîce bt. Abdullah tarafından da‘vâ-yı âtiyyede husûmet ve redd-i cevâba vekîl olup mezbûrenin zâtını ma‘rifet-i şer‘iye ile [ârifân] el-Hâc Mahmud b. Abd[ullah] ve Ali Ağa b. Sefer şehâdetleri ile vekâleti sâbite hâlâ zevci olan Hüseyin Ağa b. Abdullah mahzarında üzerine da‘vâ ve takrîr-i kelâm edip biz müteveffâ-yı mezbûr Mehmed Ağa’nın câriye-i memlûkeleri olup hâl-i sıhhatinde bizi hasbeten lillâh tahrîr [ve] i‘tâk eylemişken mezbûre Hadîce bizi rıkkı olmak üzere zabteder suâl olunup sebîlimiz tahliye olunmak matlûbumuzdur dediklerinde gıbbe’s-suâl ve’l-inkâr müdde‘iyetân-ı mezbûretândan müdde‘âlarını mübeyyine beyyine taleb olundukda udûl-i Müslimînden Salih Efendi b. Mehmed ve Abdülkerim Çelebi b. Mehmed nâm kimesneler li-ecli’ş-şehâde meclis-i şer‘de hâzırân olup isre’l-istişhâd fi’l-vâki‘ müdde‘iyetân-ı mezbûretân Canan ve Gülistan’ı mevlâları bizim huzûrumuzda i‘tâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın mûcebince müdde‘iyetân-ı mezbûretânın ıtklarına hüküm birle mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ârif Mehmed Efendi, es-Seyyid Lütfullah, el-Hâc Mahmud, eş-Şeyh Yusuf Efendi, Sefer Efendi b. Mehmed, Şaban Efendi b. Hasan.