İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 721 Hüküm no: 868 Orijinal metin no: [110a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Kara Çelebizâde Ebulfazl Mahmud Efendi’nin mirası hususunda varislerin birbirlerinin zimmetlerini ibra ettikleri <> Dârü’s-saltanati’l-aliyye mahmiye-i Kostantıniyye’de Muhtesib Karagöz mahallesinde sâkin olup Rumeli kādıaskerliğinden münfasıl iken bundan akdem vedâ‘-ı âlem-i fânî eden merhûm Kara Çelebizâde Ebulfazl Mahmud Efendi b. el-mevla’l-merhûm Mehmed Efendi’nin verâseti zevce-i metrûke-i muhteremeleri Hadîce Hatun bt. el-mevla’l-merhûm Mazhar Efendi’ye ve sulbiye kebîre kerîme-i mükerremeleri umdetü’l-muhadderât Hamide Hatun’a ve sulbî oğlu merhûm Osman Efendi’nin sulbî sagīr oğulları Mehmed Çelebi, Mustafa Çelebi’ye münhasıra olup kable’l-kısme mezbûr Mehmed Çelebi dahi fevt olup verâseti vâlidesi Safiye bt. Abdullah nâm hatuna ve li-ebeveyn karındaşı mezbûr Mustafa Çelebi’ye münhasıra olup kable’l-kısme mezbûr Mustafa Çelebi dahi fevt olup verâseti vâlide-i mezbûre Safiye Hatun ile babası müteveffâ-yı mezkûr Osman Efendi’nin babası merhûm-ı mezkûr Mahmud Efendi’nin ammi Abdülaziz Efendi’ye münhasıra olup kable’l-kısme merkūm Abdülaziz Efendi dahi fevt olup verâseti zevce-i metrûkesi fahrü’l-muhadderât Âişe Hatun bt. el-mevla’l-merhûm Şeyhülislâm Mehmed Efendi’ye ve benât-ı sulbiyesi Fâtıma ve Afife ve Havva nâm hatunlara münhasıra olup tashîh-i mes’eleleri beş yüz yetmiş altı sehimden i‘tibâr olunup sihâm-ı mezkûreden on beş sehmi mezkûre Âişe Hatun’a ve otuz beş sehmi mezbûrât Fâtıma ve Afife ve Havva nâm hatunlara isâbet ve intikāl eylediği zâhir oldukdan sonra husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. el-Hâc Hüseyin irsâl olunup ol dahi mahmiye-i mezbûrede merhûm Sultan Selim Han -aleyhi’r-rahmetü ve’l-gufrân- câmi‘-i şerîfi kurbünde vâki‘ Enserci mahallesinde sâkin umdetü’l-ulemâ’i’l-izâm zübdetü’l-fudalâi’l-fihâm Halıcızâde Ahmed Efendi’nin menzil-i âlîlerine varıp zeyl-i vesîkada mastûrü’l-esâmî olan Müslimîn huzûrlarında akd-i meclis-i şer‘ eyledikde mezbûre Âişe ile mezbûrât Fâtıma ve Afife ve Havva nâm hatunların tarafından ikrâr-ı âti’z-zikre vekîl olup zât-ı mezbûrâtı ma‘rifet-i şer‘iye ile ârifân Mahmud Ağa b. Abdurrahman ve Ahmed Bey b. Abdülmennan nâm kimesneler şehâdetleri [ile] şer‘an vekâleti sâbite olan mûmâ-ileyh Ahmed Efendi hazretleri meclis-i ma‘hûd-ı mezbûrede mûmâ-ileyhimâ Hadîce Hatun ve Hamide Hatun taraflarından ikrâr-ı âti’z-zikri tasdîka vekîl olup nehc-i şer‘-i mu‘teber üzere şer‘an vekâleti sâbite olan kıdvetü’l-müderrisîn Ömer Efendi b. ( ) mahzarında bi’l-vekâle ikrâr ve takrîr-i kelâm edip müteveffâ-yı evvel-i merhûm-ı mûmâ-ileyh Mahmud Efendi’nin mecmû‘-ı terekesinden müteveffâ-yı sâlis Mustafa Çelebi’ye ve müteveffâ-yı mezbûr Mustafa’dan müvekkilelerim mezbûrât Âişe ve Afife ve Fâtıma ve Havva’nın mûrisleri ve merhûm Abdülaziz Efendi’nin hisse-i şâyi‘asına isâbet ve intikāl eden mecmû‘-ı nükūd ve emti‘a ve akmişe ve kütüb ve esâs-ı beyt ve evânî-i nühâsiye ve gayr-ı nühâhsına ve sâir emlâk ve akārât ve çiftliklerden müvekkilelerim mezbûrâta isâbet ve intikal eden mecmû‘-ı hisse-i mefrûzalarını mûmâ-ileyhimâ Hadîce Hatun ve Hamide Hatun yedlerinden bi’t-tamam ahz u kabz eylediler min-ba‘d müvekkilelerim mezbûrânın müvekkiletân-ı mûmâ-ileyhimâ Hadîce ve Hamide hatun[lar] zimmetlerinde bir akçe ve bir habbe hakları kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve terkīm ba‘dehû ma‘an irsâl olunan Ahmed b. Ebûbekir meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Saferü’l-hayr li-sene isneteyn ve seb‘în ve elf. Şuhûdü’l-hâl: Fahrü’l-müderrisîn Rasûl Efendi, Fahrü’l-kuzât Ali Eendi b. Üveys, Fahrü’l-cüyûş Cafer Çavuş b. Mehmed, fahrü’l-akrân Ali Ağa b. ( ), Mehmed Bey b. Receb, Ömer Çelebi b. ( ), Ali Beşe b. Nasuh çukadâr, Mustafa Çelebi b. ( ) kethudâ, Ahmed Çelebi b. ( ).