İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 720 Hüküm no: 867 Orijinal metin no: [109b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Ramazan’ın boşandığı kocası Mehmed b. Abdullah’ta 1.600 akçe mehir alacağı olduğu İsbât-ı tezevvüc ve yemîn. Mahmiye-i İstanbul’da Sarrâchâne kurbünde sâkine işbu bâ‘isetü’l-kitâb Ümmühani bt. Ramazan nâm hatun mahfil-i kazâda zevci Mehmed b. Abdullah mahzarında üzerine da‘vâ ve takrîr-i kelâm edip zevcim mezbûr Mehmed ben Edirne’ye giderim eğer yetmiş gün tamamına değin gelmezsem benden boş ol deyü şart eyledikden sonra üç sene gelmemekle mezbûr Mehmed’den mutallaka olmuş idim hâlâ zimmetinde mütekarrir ve ma‘kūdün-aleyh olan bin altı yüz akçe mehr-i mü’eccelimi taleb ederin suâl olunsun dedikde gıbbe’s-suâl mezbûr Mehmed cevâbında fi’l-hakīka vech-i muharrer üzere şart eylediğini ikrâr lâkin Edirne’ye gidip kırk beş gün mürûrunda mahmiye-i mezbûreye gelip vâsıl olmağla şart vâki‘ olmamışdır deyü def‘le mukābele edecek mezbûr Mehmed’den def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Mehmed şart-ı mezkûrdan kırk beş gün sonra mahmiye-i mezbûreye gelip dahi vâsıl olmadığına merkūme Ümmühani’ye yemîn teklîf olundukda ol dahi alâ-vefki’l-mesûl yemîn billâhi’l-aliyyü’l-a‘lâ etdikden sonra mezbûre Ümmühani’nin mehr-i mü’ecceli [110a] hâlâ mezbûr Mehmed’den lâzım gelmekle mezbûr Mehmed istintâk olundukda ancak bin akçe mehr-i mü’ecceli olduğunu ikrâr ve ziyâde olan altı yüz akçeyi inkâr edicek müdde‘iye-i merkūmeden ziyâdeye beyyine taleb olundukda udûl-i Müslimînden olup zikri mürûr eden Sarrâchâne’de İmâm Ömer Efendi b. Ali ve Ömer Çelebi b. Ali nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘iye-i mezbûre Ümmühani nefsini üç sene mukaddem mezbûr Mehmed’e bin altı yüz akçe mehr-i mü’eccel ile huzûrumuzda tezvîc edip ol dahi tezevvüc ve kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra mûcebince meblağ-ı mezbûr bin altı yüz akçeyi müdde‘iye-i merkūmeye edâ ve teslîme mezbûr Mehmed’e tenbîh birle mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mahmud Beşe el-mübâşir, Ahmed Çelebi b. Mahmud, Veli b. Mahmud, Ahmed b. Abdülcabbar, Şükrullah b. Mustafa, Hasan b. Receb.