İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 723 Hüküm no: 870 Orijinal metin no: [110b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Ahmed’in muhâlaa yoluyla kocası Asesbaşı Ahmed Ağa’dan boşandığı Bi’l-vekâle hul‘. Mahrûse-i Bursa’da Karacaahmed mahallesinde sâkine Râbia bt. Ahmed nâm hatun meclis-i şer‘de hâlâ asesbaşı olan umdetü’l-emâcid ve’l-a‘yân Ahmed Ağa b. ( ) tarafından husûs-ı âti’z-zikri tasdîka vekîl olup Osman Beşe b. İdris ve Mustafa Beşe b. Sefer şehâdetleri ile şer‘an vekâleti sâbite olan Mahmud Çavuş b. Mustafa mahzarında ikrâr ve i‘tirâf edip zevcim mezbûr Ahmed Ağa zimmetinde mütekarrir ve ma‘kūdün-aleyh olan otuz bin akçe mehr-i mü’eccelimin on bin akçesini yedinden ahz u kabz edip bâkī yirmi bin akçe mehr-i mü’eccelim üzerine ve nafaka-i iddet-i ma‘lûmem ve me’ûnet-i süknâm dahi kendi üzerime olmak üzere merkūm Ahmed Ağa ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete ve gayra müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Beşe b. Mehmed, İbrahim b. Abdurrahman, Mehmed Beşe b. İbrahim, Abdurrahman Beşe b. Hamza, Süleyman Beşe b. Abdullah, Osman Beşe b. Şaban, Ahmed Beşe b. Mustafa.