İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 732 Hüküm no: 882 Orijinal metin no: [112b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Ömer’in elindeki merhum Yusuf Ağa’ya ait rehin eşyayı varislerleriyle anlaşarak iade ettiği Dergâh-ı âlî yeniçerilerinden kırk birinci cemâ‘ate mahsûs oda ahâlîsinden Ali Beşe b. Ömer meclis-i şer‘de bundan akdem mahmiye-i İstanbul’da Sinan Paşa mahallesinde fevt olan Yusuf Ağa’nın zevce-i metrûkesi ve terekesine vâzı‘atü’l-yed olan Âişe Hatun bt. Mehmed tarafından zikri âtî husûsda vekîl olup mezbûrenin zâtını ma‘rifet-i şer‘iye ile ârifân olan Seyyid Ahmed Çelebi b. Hasan ve Abdullah Çelebi b. Rasûl şehâdetleriyle şer‘an sâbite olan Seyyid Ahmed Efendi b. Şeyhî mahzarında ikrâr ve i‘tirâf edip mezbûr Yusuf Ağa’ya hayatında kırk bin akçe ikrâz ve teslîm ol dahi iktirâz ve kabz etdikden sonra meblağ-ı mezbûr mukābelesinde merkūm Yusuf mülkü olan bir sîm raht ve bir sîm kılıç ve müvekkile-i mezbûrenin mülkü olan bir mühürlü on sekiz aded altın düğme ve mühürlü bir mücevher kuşak ve bir küpeyi emri ile yedime rehin vaz‘ ve teslîm edip meblağ-ı mezbûru kable’l-ahz fevt olmağla meblağ-ı mezbûrun yirmi üç bin akçesini mezbûrenin yedinden kabz edip rihân-ı mezbûreden zikrolunan sîm raht ve sîm kılıç ve küpeyi mezbûre Âişe’ye teslîm edip bâkī on yedi bin akçemi mezbûre Âişe’den makbûzu olan tereke-i müteveffâ-yı mezbûrdan bana teslîm ve bâkī yedimde kalan mühürlü mücevher kuşak on sekiz aded altın düğmeyi benden ahz eylesin deyü mezbûreden da‘vâ ve taleb eylediğimde beynimizde münâza‘ât-ı kesîre cereyân etmiş idi el-hâletü hâzihî tavassut-ı muslihûn ile meblağ-ı mezbûr on yedi bin akçe da‘vâsından mezbûre Âişe benimle on bin akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûru meclis-i şer‘de vekîl-i merkūm yedinden bi’t-tamam ahz u kabz edip zikrolunan on sekiz aded altın düğme ile mücevher kuşağı vekîl-i mezbûra teslîm edip mâ‘adâdan müvekkil-i mezbûrenin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm husûs-ı mezbûra müte‘allika mezbûre Âişe ile vechen mine’l-vücûh da‘vâ ve nizâ‘ım ve alak ve medhalim kalmadı dedikde gıbbe’t-tasdîk vekîl-i mezbûr Seyyid Ahmed Efendi meclis-i mezbûrda merkūm Ali Çelebi muvâcehesinde ikrâr ve i‘tirâf edip müvekkilem mezbûrenin makbûzu olup bâlâda tafsîli mürûr eden rihân-ı mezkûre ile bedel-i sulha müte‘allika mezbûr Ali Çelebi ile vechen mine’l-vücûh da‘vâ ve nizâ‘ım yokdur dedikde ba‘de’t-tasdîk mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-seneti’l-mezbûre Şuhûdü’l-hâl: Mahmud Beşe b. ( ), Mustafa Beşe b. Ahmed, Ahmed Efendi b. Hasan, el-Hâc Mustafa b. Mehmed.