İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 731 Hüküm no: 881 Orijinal metin no: [112a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Mehmed Sivrihisar’daki mülk bağını borcuna karşılık olarak Ali b. Mehmed’e sattığı Vilâyet-i Anadolu’da Sivrihisar kazâsına tâbi‘ Bazar nâm karye sükkânından İbrahim b. Mehmed nâm kimesne meclis-i şer‘-i hatîr-i lâzımü’t-tevkīrde yine karye-i mezbûre sükkânından işbu bâ‘isü’l-kitâb Ali b. Mehmed nâm kimesne mahzarında ikrâr ve takrîr-i kelâm edip karye-i mezbûre sınırı dâhilinde vâki‘ bir tarafı Sarı Mehmed oğlu Himmet bağına ve bir tarafı Bayram Dede bağına ve bir tarafı Mahmud Beşe tarlasına ve bir tarafı tarîk-i âmma müntehî bir kıt‘a mülk bağımı bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık mezbûr Ali’ye sekiz yüz akçeye bey‘-ı bâtt-ı sahîh-i şer‘î ile bey‘ ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr sekiz yüz akçeyi mezbûr Ali’ye mukaddemâ zimmetimde bir re’s karasığır ineği semeninden olan sekiz yüz akçe deynime takās edip ol dahi mukāssa ve kabûl eyledikden sonra zikrolunan bağı mahâllinde kabz ve tasarrufa mezbûr Ali’yi taslît eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-işrîn min-Zilka‘deti’ş-şerîfe li-seneti’l-mezbûre. Şuhûdü’l-hâl: Hasan b. Mustafa, Mehmed b. Ebûbekir, Mehmed Çelebi b. Mustafa, Veli Beşe b. Mirza, Mehmed b. Mustafa, Ali Beşe b. Yakub, Mustafa b. Yakub, Baba Rasûl b. Rıdvan, Şükrullah b. Mustafa, Abdi Çelebi b. Hüseyin ve gayruhum.