İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 733 Hüküm no: 884 Orijinal metin no: [112b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un muhâlaa yoluyla kocası Yusuf b. Mehmed’den boşandığı Mahmiye-i İstanbul’da Kasab İvaz mahallesinde sâkine Fâtıma bt. ( ) nâm hatun meclis-i şer‘de bâ‘isü’l-kitâb Yusuf b. Mehmed nâm kimesne mahzarında ikrâr ve takrîr-i kelâm edip mezbûr Yusuf zevcim olup zimmetinde mütekarrir ve ma‘kūdün-aleyh dört bin akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerine olmak üzere ve yine mezbûr Yusuf benim iznimsiz sepetimden ahz u kabz edip huzûr-ı hâkimü’ş-şer‘de ikrâr ve edâ ve teslîmine tenbîh olunan dokuz altın ve bir çift bilezik ve bir tek zümrüd küpe ve yirmi kıt‘a esedî guruşdan fâriğa olmak üzere mezbûr Yusuf ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete müte‘allika da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîk mezbûre Fâtıma’nın vâlidesi Hadîce Hatun meclis-i mezbûrda merkūm Yusuf mahzarında ikrâr ve i‘tirâf edip bâlâda zikri mürûr eden eşyâsının mülkümde münselik olup mezbûr Yusuf benden izinsiz ahz u kabz eyledi deyü mezbûrdan da‘vâ ve taleb etmiş idim ben dahi zikrolunan eşyâdan mezbûr Yusuf’un zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Derviş Efendi el-imâm, Emrullah Efendi el-imâm, Derviş Çelebi b. Eyüb, Mehmed Çelebi el-müezzin, Ali Çelebi b. Yusuf, el-Hâc İbrahim [b.] Hüseyin, Hüseyin Baba b. Osman, Mustafa Çelebi kahveci, Solak Sefer Bey, Mehmed b. Mehmed, Abdi b. Hüseyin.