İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 734 Hüküm no: 885 Orijinal metin no: [113a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahin Beşe b. Murad’a Belgrat’taki Sarrâc Mustafa Ağa’nın vekili olduğunu ispat etmesi için süre verildiği İstimhâl. Dergâh-ı [âlî] yeniçerilerinin birinci ağa bölüğüne mahsûs oda ahâlîsinden olup medîne-i Belgrad’da sâkin Sarrâc Mustafa Ağa tarafından vekâlet iddi‘â eden Şahin Beşe b. Murad mahfil-i kazâda işbu bâ‘isü’l-kitâb Numan Beşe b. Mehmed mahzarında üzerine da‘vâ ve takrîr-i kelâm edip müvekkilim mezbûr Mustafa Ağa mahmiye-i Üsküdar’da Kızılmescid mahallesinde vâki‘ bir tarafı el-Hâc Mehmed mülküne ve bir tarafı Abdülbaki Çelebi mülküne ve bir tarafı mahalle-i mezbûre mescidine ve bir tarafı tarîk-i âmma müntehî mülk menzilimi târih-i kitâbdan altı ay mukaddem mezbûr Numan Beşe’ye otuz yedi bin akçeye bey‘ ve teslîm ol dahi iştirâ ve tesellüm eyledikden sonra semen-i mezbûrdan yedi bin akçesini müşteri-i mezbûr yedinden ahz u kabz edip bâkī zimmetinde otuz bin akçe hakkı kalmağın meblağ-ı mezbûr otuz bin akçenin on beş bin akçesini bana havâle ve kabza tarafından beni vekîl eylemişdi hâlâ taleb ederin suâl olunsun dedikde gıbbe’s-suâl mezbûr Numan Beşe cevâbında fi’l-vâki‘ menzil-i mezbûr semeninde bâkī zimmetinde otuz bin akçe hakkı olduğunu ikrâr ve müdde‘î-i merkūm Mustafa Ağa tarafından vekîl olduğunu inkâr edicek müdde‘î-i mezbûrdan müdde‘âsını mübeyyine [beyyine] taleb olundukda ityân-ı beyyine için istimhâl etmeğin mehl-i şer‘î ile imhâl olunup mâ-vaka‘a bi’t-taleb ketb olundu. Fi’l-yevmi’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Beşe el-mübâşir, Satılmış Beşe er-râcil, Siyavuş Bey b. Abdullah, Mehmed Beşe er-râcil 66.