İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 736 Hüküm no: 889 Orijinal metin no: [113a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Yasef v. Yahuda’nın kiracısı olduğu vakıf arsayı bedeli karşılığında Abdurrahman Efendi’ye devrettiği Tefvîz-i arsa-i muhterika, hazret-i efendinin [tefevvüzü]. Mahmiye-i İstanbul’da Kiroz cemâ‘atinden Yasef v. Yahûda nâm Yahûdî meclis-i şer‘-i hatîrde hâlâ mahmiye-i mezbûrede hâkim-i hâsim olan a‘lemü’l-ulemâ’i’l-mütebahhirîn efdalü’l-fudalâi’l-müteverri‘în yenbû‘u’l-fezâil metbû‘i’l-efâzıl âlemü’l-ilm ve’l-hüdâ menârü’l-fazl ve’t-tukā fazîletlü Abdurrahman Efendi hazretleri mahzarında ikrâr ve takrîr-i kelâm edip mahmiye-i mezbûrede Çelebioğlu Evkāfı’ndan olup icâre-i mu‘accele ve mü’eccele-i ma‘lûmeteyn ile mutasarrıf olduğum lede’l-ahâlî ve’l-cîrân ma‘lûmü’l-hudûd olan arsa-i muhterikanın hakk-ı tasarrufunu izn-i mütevellî ile efendi hazretlerine bin akçe bedel mukābelesinde tefvîz edip ol dahi tefevvüz ve kabûl eyledikden sonra bedel-i tefvîz olan meblağ-ı mezbûr akçeyi mûmâ-ileyh efendi hazretleri yedinden tamamen ahz u kabz eyledim ba‘de’l-yevm arsa-i mezbûre-i mahdûde mûmâ-ileyh efendi hazretlerinin hakk-ı müfevvazidir keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Çelebi b. Mahmud, Hasan Çelebi b. Halil, Şaban Beşe sarrâc, el-Hâc Ahmed b. Mahmud, Abdi b. Hüseyin.