İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 736 Hüküm no: 888 Orijinal metin no: [113a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador v. Haçok’un tasarrufunda bulunan tarlanın kullanım hakkını bedeli karşılığında Aleksan v. Kirkor’a devrettiği Tefvîz-i tarla. Vilâyet-i Anadolu’da Divriği kazâsına tâbi‘ Kesme nâm karye sükkânınan olup mahmiye-i İstanbul’da Langakapısı kurbünde sâkin hammâl tâifesinden Asvador v. Haçok nâm Ermeni meclis-i şer‘de yine karye-i mezbûre sükkânından işbu bâ‘isü’s-sifr Aleksan v. Kirkor nâm Ermeni muvâcehesinde ikrâr ve takrîr-i kelâm edip karye-i mezbûre sınırı dâhilinde vâki‘ bir tarafı Toros tarlasına ve bir tarafı Hakapoş tarlasına ve bir tarafı Rumoğlu Kirkor tarlasına ve bir tarafı tarîk-i âmma müntehî taht-ı tasarrufumda olan tarlamın hakk-ı tasarrufunu ma‘rifet-i sahib-i arz ile otuz kıt‘a riyâlî guruş bedel mukābelesinde mezbûr Aleksan’a ferâğ ve tefvîz ol dahi tefevvüz ve kabûl eyledikden sonra bedeli olan meblağ-ı mezbûr otuz kıt‘a riyâlî guruşu mezbûr Aleksan yedinden tamamen ahz u kabz eyledim ba‘de’l-yevm zikri mürûr eden tarlada ve bedelinde alâka ve medhalim kalmadı mahâllinde zabt u tasarrufa mezbûr Aleksan’ı taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūnü’l-hâzırûn.