İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 741 Hüküm no: 896 Orijinal metin no: [114a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalya ve Borlu Yahudi cemaatine mahsus mabedin mîrîye ait olan arsasının Sabri Mehmed Efendi’ye satıldığı El-emru kemâ-hurrire fîh Ketebehû’l-fakīru ileyh sübhânehû Abdurrahman el-kādî bi-medîneti Kostantıniyyeti’l-mahmiye -Gufire leh- Bi’l-fi‘il şıkk-ı evvel defterdârı olan sahibü’s-sa‘âdeti ve’l-iclâl sahibü ezyâli’l-mecd ve’l-ikbâl zü’l-kadri’r-refî‘ ve’l-câhi’l-menî‘ el-mahfûfu bi-sunûf-i avâtıfi’l-meliki’l-mu‘în Hazret-i Hüseyin Paşa taraf-ı ‘izzet-şereflerinden husûs-ı âti’z-zikri ikrâra vekîl olup nehc-i şer‘î üzere vekâleti sâbite olan fahrü’l-emâsil ve’l-akrân Mustafa Çavuş b. Mahmud meclis-i şer‘-i hatîrde işbu kitâbın sahibi umdetü’l-emâcid ve’l-a‘yân Sabri Mehmed Efendi tarafından ikrâr-ı âti’z-zikri tasdîka vekîl-i şer‘îsi olan fahrü’l-emsâl el-Hâc Ahmed Ağa mahzarında bi’l-vekâle ve takrîr-i kelâm edip mahmiye-i İstanbul’da Sarı Timurcı mahallesinde vâki‘ bir tarafı ba‘zan mü’ezzine meşrûta olan arsa-i hâliye ve ba‘zan Hüseyin Efendi mülküne ve bir tarafı ba‘zan Yahûdî odaları arsasına ve ba‘zan tarîk-i hâssa ve bir tarafı ba‘zan Fâtıma Sultan mülküne ve ba‘zan tarîk-i âmma müntehî Adalya ve Borlu cemâ‘atlerine mahsûs Yahûdî kenîsesi bin yetmiş senesinde vâki‘ harîkde bi’l-külliye muhterik olmağın kenîse-i merkūme kadîme olup bânîsi ma‘lûm olmamağla kenîse-i mezbûre arsası şer‘an cânib-i mîrîye âide [114b] olmağın bundan akdem arsa-i mezkûre sûk-ı sultanîde beyne’t-tâlibîn ve’r-râgıbîn nidâ ve müzâyede olunup ragabât-ı nâs bi’l-külliye münkatı‘ oldukdan sonra yirmi bin akçede karâr edip ziyâde ile tâlib-i âhar zuhûr etmemekle arsa-i mahdûde-i mezkûreyi bi’l-cümleti’t-tevâbi‘ ve’l-levâhık müvekkilim Paşa-yı müşârün-ileyh bin yetmiş bir Zilhiccesi’nin on birinci gününde müvekkil-i mezbûr Mehmed Efendi[‘ye] semen-i misli olan yirmi bin akçeye işbu yedinde olan mühürlü ve nişânlı rûznâmçe-i hümâyûn sûreti mûcebince bâtten bey‘ ve teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûru tamamen mîrî için müvekkil-i mûmâ-ileyh Mehmed Efendi yedinden alıp kabz eyledi ba‘de’l-yevm arsa-i mahdûde-i mezkûre mûmâ-ileyh Mehmed Efendi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn mine’l-Muharremi’l-harâm li-sene isneteyn ve seb‘în ve elf. Şuhûdü’l-hâl: Ahîzâde Ahmed Efendi b. Mehmed Efendi, Abdülkadir Efendi b. Mehmed Dede, Mustafa Efendi b. el-Hâc Hüseyin, Mehmed Ağa b. Oruc, Abdurrahman b. Mustafa, Mehmed Bey el-cündî.