İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 740 Hüküm no: 895 Orijinal metin no: [114a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi b. Mehmed’in tasarrufunda olan vakıf menzilini kendi malıyla tamirine izin verildiği Mâ fih kemâfîh Harrerehü’l-fakīru ileyh te‘âlâ Mehmed b. Ahmed el-müvellâ-hilâfetenten bi-medîneti Kostantıniyyeti’l-mahmiye -Ufiye anhümâ- Dârü’s-saltanati’s-seniyye Kostantıniyyeti’l-mahmiye’de Fethiye Câmi‘-i Şerîfi’nde imâm olan mefharu’l-eimme İbrahim Efendi b. Mehmed meclis-i şer‘-i şerîf-i lâzımü’t-teşrîfde takrîr-i kelâm edip merhûme Fâtıma Hatun Vakfı’ndan süknâsı Fethiye Câmi‘-i Şerîfi’nde imâm olanlara meşrûta olup mahmiye-i mezbûrede Yazıcı mahallesinde vâki‘ bir tarafı câmi‘-i mezbûr duvarına ve bir tarafı kapıcı tasarrufunda olan menzile ve bir tarafı Seyyid Ali Efendi menziline ve bir tarafı tarîk-i âmma müntehî menzil ber-mûceb-i şart-ı vâkıf tasarrufumda olup lâkin menzil-i mezbûr mürûr-ı eyyâm ile harâb ve mâil-i turâb olup bir vechile kābil-i süknâ olmayıp binâya eşedd-i ihtiyâc ile muhtâc olmağın menzil-i mezbûru ke’l-evvel kendi mâlımla câmi‘-i mezbûrda imâm olanlar sâkin olmak üzere binâya bana izin verilmesi murâdımdır dedikde menzil-i mezbûr vech-i muharrer üzere harâb ve mâil-i turâb olup binâya eşedd-i ihtiyâc ile muhtâc olduğun lede’ş-şer‘ zâhir ve mütekarrir olmağın merkūm İbrahim Efendi’ye izin birle mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Şevvali’l-mükerrem li-seneti’l-mezbûre Şuhûdü’l-hâl: Muslı el-müezzin, Abdullah Çelebi el-müezzin, Hasan Efendi b. Ahmed, Abdünnebi b. ( ) kayyûm, Hasan Çelebi b. ( )