İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 743 Hüküm no: 899 Orijinal metin no: [115b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mustafa’nın Gül Camii mahallesindeki yarım menzil hissesini Ahmed Halife b. Musa’ya sattığı Hüccet-i bey‘. Mahmiye-i İstanbul’da Gül Câmi‘ mahallesinde sâkin Hüseyin b. Mustafa nâm şâbb-ı emred meclis-i şer‘-i hatîrde işbu râfi‘u’l-kitâb Ahmed Halîfe b. Musa mahzarında tâyi‘an ikrâr ve takrîr-i kelâm edip mahalle-i mezbûrede vâki‘ bir tarafdan Monla Çelebi Vakfı’na ve bir tarafdan mahalle-i merkūme mü’ezzinine meşrûta menzile ve bir tarafdan tarîk-i hâssa ve bir tarafdan tarîk-i âmma müntehî bir bâb fevkānî ve bir bab tahtânî odaları ve bir tahtadan çatma odayı ve kenîfi müştemil olan mülk menzilin nısf-ı şâyi‘i hazır bi’l-meclis İbrahim Beşe b. Ahmed’in mülkü ve nısf-ı şâyi‘-i âharı benim mülküm olup ilâ-hâze’l-ân müşâ‘iyet üzere mutasarrıflar idik el-hâletü hâzihî menzil-i mahdûd-ı mezbûrda olan nısf-ı şâyi‘ hissemi mezbûr Ahmed Halîfe’ye yedi yüz esedî guruşa bâtten bey‘ ve teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr [yedi] yüz esedî guruşu tamamen mezbûr Ahmed Halîfe yedinden alıp kabz eyledim ba‘de’l-yevm menzil-i mezbûrun nısf-ı şâyi‘i mezbûr Ahmed Halîfe’nin mülk-i müşterâsıdır keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: İsmail Efendi b. Mehmed el-imâm, Abdülkerim b. İbrahim el-müezzin, Odabaşı el-Hâc Mehmed, Rasûl b. Rıdvan, Mahmud b. Murad.