İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 744 Hüküm no: 900 Orijinal metin no: [115b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Ahmed Efendi b. Abdülkadir’in merhum Müezzinzâde Ahmed Efendi’de olan alacağını terekesinden tahsil ettiği İbrâ. İşbu râfi‘u’l-kitâb fahrü’l-kuzât Ahmed Efendi b. Abdülkadir meclis-i şer‘-i hatîrde sâbıkā Sakız kādısı olup bundan akdem vefât eden Müezzinzâde Ahmed Efendi b. Mehmed Efendi’nin evlâd-ı sıgārı Hamdi Çelebi ve Mehmed Çelebi ve Hadice’nin vasîyy-i şer‘îleri olmağla müteveffâ-yı mezbûrun terekesine vâzı‘u’l-yed olan Mustafa Efendi b. el-Hâc Ebûbekir mahzarında üzerine da‘vâ ve takrîr-i kelâm edip müteveffâ-yı mezbûr Ahmed Efendi’ye hâl-i sıhhatinde elli riyâlî guruş ikrâr (ikrâz) ve teslîm ve ol dahi iktirâz ve yedimden ahz u kabz edip meblağ-ı mezbûr zimmetinde bana edâsı lâzım deyn oldukdan sonra yine hayatında yirmi beş riyâlî guruşu yedinden alıp bâkīsi olan yirmi beş riyâlî guruşunu kable’l-edâ vefât edip terekesine vasîyy-i mezbûr vâzı‘u’l-yed olmağın suâl olunup tereke-i vâfiyesinden alıverilmek taleb ederin dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ricâl-i Müslimînden olup müteveffâ-yı mezbûrun kethudâsı Mustafa Çelebi b. Şaban ve huddâmından Ali b. Zülfikar nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûr Ahmed Efendi müteveffâ-yı merkūm Ahmed Efendi’ye hâl-i hayatında elli riyâlî guruş ikrâz ve teslîm ol dahi bizim huzûrumuzda iktirâz ve tesellüm edip meblağ-ı mezbûr zimmetinde deyn oldukdan sonra i‘tirâfı mûcebince yirmi beş guruşunu alıp bâkīsi olan yirmi beş riyâlî guruşu zimmetinde iken vefât eyledi biz bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra meblağ-ı bâkī-i mezbûru küllen veyâ ba‘zan ahz u istifâ veyâ turûk-ı şer‘iyeden bir tarîk ile müteveffâ-yı mezbûrun zimmetini ibrâ ve ıskāt etmediğine müdde‘î-i mezbûr Ahmed Efendi’ye yemîn teklîf ol dahi alâ-mâ hüve’l-mesûl halfü billâhi’l-aliyyü’l-azîm etmeğin mûcebince ba‘de’l-hükm mezbûr Ahmed Efendi meclis-i şer‘de vasîyy-i mezbûr muvâcehesinde ikrâr edip edâsına hükm-i şer‘î lâhık [116a] olan yirmi riyâlî guruşu vasîyy-i mezbûr yedinden alıp kabz eyledim ba‘de’l-yevm meblağ-ı mezbûrdan müteveffâ-yı mezbûrun veresesi zimmetlerinde bir akçe ve bir habbe hakkım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Osman Çelebi b. Mustafa ser-bölük, Hasan b. Mustafa, Eyüb b. Ali, Süleyman b. Mehmed, Mehmed b. Abdullah, Monla Muharrem b. Mustafa Efendi.