İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 745 Hüküm no: 902 Orijinal metin no: [116a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Ahmed Çavuş’un Sofular mahallesindeki arsasını Ahmed Ağa’ya sattığı Bey‘. Mahmiye-i İstanbul’da Sofular mahallesinde sâkin Ali Çelebi b. Ahmed Çavuş meclis-i şer‘-i hatîrde on dört bölüğün çorbacısı işbu râfi‘u’l-kitâb fahrü’l-emâsil ve’l-akrân Ahmed Ağa b. ( ) tarafından ikrâr-ı âti’z-zikri tasdîka vekîl olup nehc-i şer‘î ve vech-i mer‘î üzere vekâleti sâbite olan Ali Odabaşı b. Mehmed mahzarında ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan ba‘zan Çengi Solak vakfı ve ba‘zan Yusuf Efendi Vakfı’na ve bir tarafdan Âişe Hatun bt. Halil Bey mülküne ve iki tarafdan tarîk-i âmma müntehî üç su kuyusunu ve enkāzı hâvî hâriciyesi tûlen yirmi dokuz ve arzan yirmi yedi buçuk ve be-hesâb-ı terbî‘î bin yetmiş iki buçuk zirâ‘ ve dâhiliyesi tûlen yirmi altı ve arzan yirmi zirâ‘ ve be-hesâb-ı terbî‘î beş yüz yirmi zirâ‘ arsa ki cem‘an dâhilen ve hâricen bi-hesâbi’l-mezbûr bin beş yüz doksan iki buçuk zirâ‘ muhterik cemî‘ menzil arsamı âmme-i tevâbi‘ ve levâhıkı ve kâffe-i menâfi‘ ve merâfıkı ile müvekkil-i mûmâ-ileyh Ahmed Ağa’ya râyic fi’l-vakt seksen bin akçeye bâtten bey‘ ve teslîm edip ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr seksen bin akçemi bi’t-tamam ve’l-kemâl müvekkil-i mûmâ-ileyh yedinden alıp kabz eyledim ba‘de’l-yevm arsa-i mahdûde-i mezkûre mûmâ-ileyh Ahmed Ağa’nın mülk-i müşterâsıdır keyfe mâ yeşâ’ ve yürîd bilâ-nizâ‘ min-karîb ev ba‘îd mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-emâcid Ali Ağa b. Mustafa, Musa Efendi b. Hasan imâmü’l-mescidi’l-Bey, Abdi Ağa b. Kasım, Ali Ağa b. Mustafa, Mehmed Ağa çorbacı 26, Mehmed Çelebi b. Ahmed, Hüseyin Çelebi b. Hasan bayrakdâr, Ahmed Beşe b. Mehmed, Bayram Beşe b. Ali, el-Hâc Ahmed b. Mahmud, Abdi Çelebi b. Hüseyin, Hüseyin Bey b. Bekir, Baba Rasûl b. Rıdvan.