İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 746 Hüküm no: 903 Orijinal metin no: [116a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. İbrahim’in Hızır Bey mahallesindeki menzilini Mehmed Beşe b. Abdullah’a sattığı Mahmiye-i İstanbul’da Hızır Bey mahallesinde sâkin Halil b. İbrahim meclis-i şer‘-i hatîrde işbu râfi‘u’l-kitâb Mehmed Beşe b. Abdullah mahzarında ikrâr ve takrîr-i kelâm edip akd-i âtî sudûruna dek silk-i mülkümde olup mahalle-i mezbûrede vâki‘ bir tarafdan merhûm Hâmid Efendi Vakfı’na ve bir tarafdan Bâzârcı Halil mülküne ve bir tarafdan Haraçcızâde mülküne ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve bir kenîfi müştemil cemî‘ menzilimi kâffe-i menâfi‘ ve merâfıkı ile mezbûr Mehmed Beşe’ye râyic fi’l-vakt on dokuz bin akçeye bâtten bey‘ ve teslîm ol dahi minvâl-i muharrer üzere iştirâ ve kabûl eyledikden sonra semeni olan meblağ-ı mezbûru tamamen yedinden alıp kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ebûbekir b. ( ) el-bâyi‘u’l-mezbûr, Hüsnü Bey b. Abdullah, İslam Beşe b. Mehmed, Mumcu Sefer Beşe, Seyyid Hilmi b. İbrahim, Ali Bey b. Abdullah ve gayruhum mine’l-huzzâr.