Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 242 Hüküm no: 267 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe’nin varislerinden annesi Şakire Hanım’ın diğer varis Süleyman Ağa’da olan miras hissesini tahsil etmesi El-emru kemâ hurrire fîhi harrerehu’l-fakīr ileyhi te‘âlâ İbrahim b. Receb el-müvellâ hilâfeten bi-medîneti Kostantıniyyeti’l-mahmiye. -Ufiye anhu- Mahmiye-i İstanbul’da Balaban Ağa mahalesinde sâkine iken bundan akdem vefât eden Âişe bt. İsmail nâm hatunun verâseti zevc-i metrûku Süleyman Ağa b. Mehmed nâm kimesne ile vâlidesi Şakire bt. Abdullah nâm hatuna ve sadrî sagīr oğulları Ahmed’e ve Mehmed’e ve sadriye sagīre kızları Fâtıma ve Hanife’ye münhasıra olduğu şer‘an sâbit oldukdan sonra mezbûre Şakire’nin oğlu ve tarafından husûs-ı âti’l-beyâna vekîl olup vekâleti zâtını ma‘rifet-i şer‘iyye ile ârifân Mehmed Beşe b. Ahmed ve Halil Bey b. Mehmed nâm kimesneler şehâdetleri ile şer‘an sâbite olan Musa Beşe b. İsmail Efendi meclis-i şer‘-i hatîrde sıgār-ı mezbûrûnun babaları ve velîleri olup asâleten ve velâyeten tereke-i müteveffât-ı mezbûreye vâzı‘u’l-yed olan işbu râfi‘ü’l-kitâb mezbûr Süleyman Ağa muvâcehesinde ikrâr ve takrîr-i kelâm edip müvekkilem mezbûre Şakire müteveffât-ı mezbûrenin mezbûr Osman Ağa zimmetinde olan dört bin akçe mehrinden ve bey‘ olunan muhallefâtı semeni olan on altı bin akçeden hissesi olan üç bin altı yüz akçeyi mezbûr Süleyman Ağa yedinden ahz u kabz etdikden sonra müteveffât-ı mezbûrenin akār ve menkūl ve esâs-ı beyt ve evânî-i nühâsiyeve gayr-ı nühâsiye kalîl ü kesîr ve zâhir ü hafî cemî‘ terekesinden yetmiş iki sehmden hissesi olan on iki sehmi mukābelesinde mezbûr Süleyman Ağa ile şerâitini hâvî, mevânî‘den ârî bi-tarîkı’t-tehâruci’ş-şer‘î dört bin yüz akçeye sulh olup bedel-i sulh-ı merkūmu mezbûr Süleyman yedinden ahz u kabz etdikden sonra tereke-i müteveffât-ı mezbûra müte‘allıka âmme-i de‘âvîden mezbûr Süleyman Ağa’nın zimmetini ibrâ-i âmm-ı kâtı‘u’n-nizâ‘ ile ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 min-Recebi’l-mürecceb li-sene 1081. Şuhûdü’l-hâl: Mustafa Halîfe b. Osman, Mehmed b. Abdullah, Mehmed b. Osman, Mehmed Ağa b. Abdullah, Mustafa Çelebi.