Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 243 Hüküm no: 268 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofya’nın Yazıcı mahallesindeki menzilin müştemilatıyla birlikte Mehmed Efendi’ye satılması Mâ-fîhi mine’l-mübâya‘ati’ş-şer‘iyye cerâ ledeyye’l-fakīr ileyhi te‘âlâ İbrahim b. Receb el-müvellâ hilâfeten bi-medîneti Kostantıniyye. Vilâyet-i Rumili’nde medîne-i Sofya mahallâtından Yazıcı mahallesi ahâlîsinden olup mahmiye-i İstanbul’da Mimârsinan mahallesi ahâlîsinden ( ), işbu râfi‘ü’l-kitâb Mehmed Efendi b. Mustafa muvâcehesinde ikrâr ve takrîr-i kelâm edip zikr-i âtî akdin sudûruna değin silk-i mülkünde münselik olup mahalle-i mezbûrede vâki‘ bir tarafdan Yahya Efendi mülkü ve bir tarafdan ba‘zan İsa Efendi mülkü ve ba‘zan Memican Efendi verese mülkleri ve bir tarafdan tarîk-i âm ile mahdûd ve mümtâz olup iki bâb tahtânî oda ve bir bâb fevkānî oda ve bir sofa ve mezbûr Mehmed Efendi ile müşterek su kuyusunu ve kenîfi ve zât-ı eşcâr-ı müsmire ve gayr-ı müsmireyi hâvî olup beher sene merhûm Hoca Üveys Vakfı’na on iki akçe mukāta‘a-i zemîni olan mülk menzilimi cümle tevâbi‘ ve levâhıkıyla mezbûr Mehmed Efendi’ye yirmi iki bin akçeye tarafeynden îcâb ve kabûlü hâvî bey‘-i bâtt-ı sahîh ile bey‘ ve teslîm edip, ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr yirmi iki bin akçeyi mezbûr Mehmed Efendi yedinden ahz u kabz edip ba‘de’l-yevm mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-Recebi’l-ferd li-sene 1081. Şuhûdü’l-hâl: Fahrü’l-akrân Şa‘bân Efendi b. el-imâm, Ramazan b. Cafer, umdetü’l-müderrisîni’l-kirâm Ataullah Efendi, İbrahim Çelebi b. Abdullah.