İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 816 Hüküm no: 992 Orijinal metin no: [136b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Hasan tarafından cariye olarak tutulmak istenen Rabia bt. Mehmed’in hür olduğunu ispat ettiği İşbu râfi‘atü’l-vesîka Râbia bt. el-Hâc Mehmed mahfil-i kazâda kendiye rık olmak zu‘mu ile vâzı‘u’l-yed [eden] Ahmed Beşe b. Hasan mahzarında üzerine da‘vâ ve takrîr-i kelâm edip ben mahmiye-i İstanbul’da Kadıçeşmesi kurbünde Sinan Ağa mahallesinde sâkine Âmine nâm hürretü’l-aslın sadrından mütevellide kızı olup babam mezbûr el-Hâc Mehmed dahi hürrü’l-asl iken merkūm Ahmed Beşe bana rık olmak üzere vaz‘-ı yed eder suâl olunup kasr-ı yedine tenbîh olunması murâdımdır dedikde gıbbe’s-suâl merkūm Ahmed Beşe cevâbında işbu hazır bi’l-meclis İsmail Beşe nâm kimesneye câriye olmak üzere mezbûre Râbia’yı gāib ani’l-meclis Ahmed nâm kimesneden yüz seksen esedî guruşa iştirâ ve tesellüm ve teslîm-i semen edip târih-i kitâbdan yirmi gün mukaddem merkūm İsmail Beşe dahi mezbûre Râbia’yı minvâl-i muharrer üzere bana yüz aded yaldız altınına bey‘ ve teslîm ben dahi iştirâ ve tesellüm ve teslîm-i semen etmekle mülk-i müşterâm olmuşdur ona binâen vaz‘-ı yed ederin mezbûrenin ber-minvâl-i muharrer hürretü’l-asl olduğu ma‘lûmum değildir deyü inkâr edicek müdde‘iye-i mezbûreden müdde‘âsını mübeyyine beyyine taleb olundukda udûl-i Müslimînden olup mahalle-i mezbûre sükkânından Mehmed Efendi b. Hasan el-imâm ve Yusuf Beşe b. Murad ve Mehmed b. Receb ve Abdurrahman b. İsmail nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ mezbûre Râbia hürretü’l-asl olup mahalle-i merkūme sükkânından Hacı Mehmed nâm kimesne zevcesi hürretü’l-asl Âmine nâm hatundan mütevellide sadriye kızıdır kat‘a ebeveynine rık târî olmayıp mezbûre Râbia’nın hürretü’l-asl idiğine şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde gıbbe’t-ta‘dîl ve’t-tezkiye [137a] şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâbi‘ min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Receb Beşe b. Halil, Mustafa Ağa b. Halil, el-Hâc Çelebi b. Mehmed, Hasan Beşe b. Mehmed, Mehmed b. Mustafa, Mehmed b. Ramazan, Şükrullah b. Mustafa ve gayruhum.