İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 815 Hüküm no: 991 Orijinal metin no: [136b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraylı Belkıs bt. Abdullah’ın mehir hususunda boşandığı kocası İbrahim b. Abdullah’ın zimmetini ibra ettiği Mahmiye-i İstanbul’da Cibali Kapısı dâhilinde Seferikoz mahallesinde sâkine Saraylı Belkıs bt. Abdullah tarafından husûs-ı câ’i’z-zikri ikrâra vekîl olup mezbûrenin zâtını ma‘rifet-i şer‘iye ile ârifân Mehmed b. İbrahim ve Mustafa Çelebi b. Ali şehâdetleriyle şer‘an vekâleti sâbite olan Ahmed Çelebi b. Mehmed meclis-i şer‘-i hatîrde mezbûre Belkıs’ın zevci olup medîne-i Halebü’ş-şehbâ’da olan İbrahim b. Abdullah tarafından husûs-ı câ’i’z-zikre sâbitü’l-vekâle vekîl olan li-ebeveyn karındaşı Receb Bey nâm bevvâb-ı sultanî mahzarında bi’l-vekâle ikrâr ve takrîr-i kelâm edip müvekkilem mezbûre Belkıs’ın zevci mezbûr İbrahim âhar diyâra gider olduğunda müvekkilemi talâk-ı bâyin ile tatlîk eylemişdi el-hâletü hâzihî müvekkilem mezbûre Belkıs Hatun zevci mezbûr İbrahim zimmetinde mütekarrir olan altı bin akçe mehr-i mü’eccelinden üç bin akçesini karındaşı ve vekîli mezbûr Receb Bey yedinden alıp mâ‘adâsı olan üç bin akçeden zevci mezbûr İbrahim’in zimmetini ibrâ ve ıskāt eyledi ba‘de’l-yevm mehr-i mü’ecceli husûsuna müvekkilemin zevci ile da‘vâsı kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin [min]-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Efendi el-imâm, Mehmed b. İbrahim, el-Hâc Ömer b. İbrahim, Hüseyin b. Hasan, Yusuf Çelebi b. Abdullah, Mustafa Çelebi b. Ali.