İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 817 Hüküm no: 994 Orijinal metin no: [137a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haseki Osman Ağa b. Mehmed’in ölen Ahmed Ağa’da olan alacağını hayatta iken tahsil etmediğine dair yemin ettiği Sâbıkā kireçcibaşı olan işbu kitâbın sahibi umdetü’l-emâcid ve’l-ekârim câmi‘ü’l-mehâmid ve’l-mekârim Haseki Osman Ağa b. Mehmed tarafından husûs-ı âtîye vekîl olup Hüseyin Bey b. Abdullah ve Halil Bey b. Hasan şehâdetleriyle şer‘an vekâleti sâbite olan li-ebeveyn karındaşı Ömer Ağa meclis-i şer‘de Vilâyet-i Rumeli’nde Iskarapar kazâsına tâbi‘ Serbeli nâm karyede sâkin iken bundan akdem fevt olan Ahmed Ağa’nın verâseti zevce-i metrûkesi Fâtıma’ya ve sulbî kebîr oğulları Haydar Ağa ve Mehmed Ağa’ya ve kebîre kızı Âmine’ye ve sagīre kızı Rukiye’ye münhasıra olduğu şer‘an zâhir ve müte‘ayyin oldukdan sonra tereke-i müteveffâ-yı mezbûra vâzı‘u’l-yed olan mezbûr Haydar Ağa mahzarında üzerine bi’l-vekâle takrîr [u] da‘vâ edip müvekkilim mezbûr Haseki Osman Ağa târih-i kitâbdan bir buçuk sene mukaddem müteveffâ-yı mezkûra hayatında on altı bin akçe ikrâz ve teslîm ve ol dahi iktirâz ve kabz edip kable’l-ahz fevt olmağın zimmetinde kalmağla meblağ-ı mezbûru tereke-i müteveffâ-yı mezbûrdan taleb ederim mezbûr Haydar Ağa’dan suâl olunsun dedikde gıbbe’s-suâl ve akībe’l-inkâr vekîl-i mezbûrdan müdde‘âsını mübeyyine beyyine taleb olundukda hadîsa-i hâssa bostancılarından Hüseyin Bey b. Mustafa ve Hüseyin Bey b. Hamza nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûr Osman Ağa târih-i mesfûrda müteveffâ-yı mezbûr Ahmed Ağa’ya hayatında bizim huzûrumuzda on altı bin akçe ikrâz ve teslîm ol dahi iktirâz ve kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra merkūm Osman Ağa meclis-i şer‘a ihzâr olunup meblağ-ı mezbûru müteveffâ-yı mezbûrdan hayatında küllen ve ba‘zan ahz u kabz veyâ hîbe veyâ âhara havâle etmeyip vücûh-ı şer‘iyeden bir vechile zimmetini ibrâ etmediğine merkūm Osman Ağa’ya yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince ba‘de’l-yevm mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Mehmed Efendi, Mehmed Ağa, Seyyid Ahmed Efendi, Hüseyin Bey b. Mehmed, Mustafa Efendi ve gayruhum.