İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 818 Hüküm no: 995 Orijinal metin no: [137a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdullah’ın Macar asıllı kölesi Yanoş v. İştevane’yi mükâtebe yoluyla azat edeceği Mahmiye-i İstanbul’da Hoca Üveys mahallesinde sâkin el-Hâc Mehmed b. Abdullah nâm kimesne meclis-i şer‘-i hatîrde kendiye rıkkını mu‘terif olan işbu orta boylu açık kaşlı koyun elâ gözlü kumral sakallı Macariyyü’l-asl Yanoş v. İştevane nâm gulâm mahzarında ikrâr ve takrîr-i kelâm edip abd-i memlûküm-i mevsûf-ı mezkûru seksen kıt‘a esedî guruş bedel mukābelesinde bundan akdem kitâbete kat‘ ol dahi kabûl eylemişdi hâlâ bedel-i mezbûrdan kırk esedî guruşun meclis-i şer‘de yedinden alıp kabz eyledim her bâr ki mezbûr Yanoş bâkī kalan kırk esedî guruşu dahi bana edâ ve teslîm eyledikde sâir ahrâr-ı asliyyîn gibi hür olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’l-işrîn min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Mahmud Çelebi b. Hasan, Mustafa Çelebi b. Hasan, Hacı Yusuf b. Abdullah, Mahmud b. Mehmed, Abdi Çelebi b. Receb.