İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 819 Hüküm no: 997 Orijinal metin no: [137b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Mustafa’nın Mustafa’da olan alacağını kefaletinden dolayı babası Ali Dede b. Mehmed’den tahsili Mahmiye-i Galata’ya tâbi‘ Kasım Paşa mahallâtından İshak Kādı mahallesinde sâkin işbu sahibü’l-kitâb Mehmed Çelebi b. Mustafa mahfil-i kazâda Ali Dede b. Mehmed nâm kimesne mahzarında üzerine da‘vâ edip merkūm Ali Dede’nin oğlu Mustafa zimmetinde beynimizde ilm-i şer‘î ile ma‘lûm sahtiyân semeninden sekiz bin akçe hakkım olup iki bin akçesini merkūm Mustafa yedinden alıp ve kabz eylediğimden sonra bâkī altı bin akçeye mezbûr Ali Dede kefîl bi’l-mâl olmuşdur lâkin kefîl oldukdan sonra yine asîl-i merkūm Mustafa yedinden bin üç yüz akçe dahi ahz u kabz edip meblağ-ı bâkī dört bin yedi yüz akçeyi kefâleti hasebiyle mezbûr Ali Dede’den taleb ederim suâl olunup alıverilmesi murâdımdır dedikde gıbbe’s-suâl mezbûr Ali Dede cevâbında fi’l-vâki‘ vech-i muharrer üzere oğlum merkūm Mustafa zimmetinde olan müdde‘î-i mezbûrun altı bin akçesine kefîl bi’l-mâl oldum lâkin ben kefîl oldukdan sonra müdde‘î-i merkūm oğlum asîl-i mezbûr yedinden üç bin üç yüz akçe ahz u kabz edip hâlâ kefîl olduğum altı bin akçeden ancak iki bin yedi yüz akçe hakkı kalmışdır deyicek isre’l-istintâk ve’l-inkâr merkūm Ali Dede’den müdde‘âsını mübeyyine beyyine taleb olundukda ikāmet-i beyyine için istimhâl etmeğin mehl-i şer‘î ile imhâl olunup mukırr u mu‘terif olduğu iki bin yedi yüz akçeyi müdde‘î-i merkūm Mehmed Çelebi’ye def‘ ve teslîme merkūm Ali Dede’ye tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed b. Hüseyin, Mustafa b. Ahmed, Mehmed b. Ali, Halil b. Mustafa.