İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 819 Hüküm no: 996 Orijinal metin no: [137b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Şaban’ın muhâlaa yoluyla boşanırken karısı Fâtıma bt. Ömer’i mehrinden vazgeçmeye zorlamadığına yemin ettiği Mahmiye-i İstanbul’da Mesih Paşa mahallesinde sâkine Fâtıma bt. Ömer nâm hatun meclis-i şer‘-i hatîrde zevc-i muhâla‘ı işbu rafi‘u’l-kitâb Mustafa b. Şaban mahzarında üzerine da‘vâ ve takrîr-i kelâm edip zevcim mezbûr Mustafa bundan akdem mehrim olan iki bin akçeden geçmek üzere bana ikrâh etmeğin ben dahi mehrimden ve nafaka-i iddetimden geçmek üzere zevcim mezbûr Mustafa ile havfımdan muhâla‘a eylemişdim suâl olunup mehr-i mü’eccelim olan meblağ-ı mezbûr iki bin akçeyi taleb ederim dedikde gıbbe’s-suâl mezbûr Mustafa cevâbında hul‘-ı mezbûru an-tav‘ olup ikrâh-ı mu‘teber ile olduğunu inkâr edicek müdde‘iye-i mezbûreden ikrâh-ı mu‘tebere beyyine taleb olundukda ityân-ı beyyineden izhâr-ı acz edip istihlâf etmeğin minvâl-i muharrer üzere müdde‘iye-i mezbûreye mehrinden geçmek üzere ikrâh-ı mu‘teber itmediğine mezbûr Mustafa’ya yemîn teklîf olundukda ol dahi alâ-mâ hüve’l-mesûl halfü billâhi’l-aliyyü’l-azîm etmeğin bilâ-beyyine mezbûre Fâtıma mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Mustafa b. Mahmud, Himmet Beşe b. Hüseyin, Veli b. Mahmud, Ahmed Beşe b. Ali, Abdi Çelebi b. Hüseyin.